बेळगाव : धामणे (ता. जि. बेळगाव) येथील श्री कलमेश्वर शेतकरी संघटना व तरुण युवक मंडळ यांच्यातर्फे खास बसवेश्वर यात्रेनिमित्त आयोजित रिकामा गाडा बैलगाडीने पळविण्याची जंगी शर्यत नुकतीच उत्साहात पार पडली.
धामणे येथे आयोजित सदर रिकामा गाडा बैलगाडीने पळविण्याच्या शर्यतीचा उद्घाटन समारंभ काल रविवारी गावातील प्रतिष्ठित नागरिक कुमाण्णा कोमाण्णाचे यांच्या अध्यक्षतेखाली आयोजित करण्यात आला होता. याप्रसंगी प्रमुख पाहुणे म्हणून माजी जि. पं. सदस्य रमेश गोरल उपस्थित होते. प्रारंभी उपस्थित मान्यवरांचा फेटा बांधून व पुष्पगुच्छ देऊन सत्कार करण्यात आल्यानंतर गोरल यांच्या हस्ते बैलगाडा चालवून शर्यतीचे उद्घाटन करण्यात आले. यावेळी श्री कलमेश्वर शेतकरी संघटना व तरुण युवक मंडळाचे पदाधिकारी आणि कार्यकर्त्यांसह बहुसंख्य शर्यतप्रेमी उपस्थित होते. सदर शर्यतीत धामणे पंचक्रोशीतील बऱ्याच बैल जोडी मालकांनी या शर्यतीत सहभाग दर्शविला होता.