शिवबसव नगर खून प्रकरणातील मुख्य संशयित आरोपी ताब्यात

बेळगाव : शिवबसवनगर येथे घडलेल्या युवकाच्या खून प्रकरणातील मुख्य संशयित आरोपीला माळमारुती पोलिसांनी निपाणी येथे ताब्यात घेतले.

पोलिसांनी अटक केलेल्या मुख्य आरोपीचे नांव अक्षय उर्फ आकाश महादेव साळुंखे (वय 36) असे असून तो बुद्धनगर निपाणी येथील रहिवासी आहे. शिवबसवनगर येथे चार दिवसापूर्वी नागराज गाडीवड्डर याचा दगडाने ठेचून खून केला आला होता. याप्रकरणी गेल्या शनिवारी प्रथमेश धर्मेंद्र कसबेकर (वय 20, रा. राजारामपुरी कोल्हापूर) आणि आकाश कडप्पा पवार (वय 21, रा. राजाराम चौक कोल्हापूर) यांना कोल्हापूर मधून अटक करण्यात आली.

कोल्हापूर स्थानिक गुन्हे अन्वेषण विभाग (एलसीबी) यांच्या सहकार्याने माळ मारुती पोलिसांनी ही अटकेची कारवाई केली होती. त्यानंतर फरारी असलेल्या मुख्य संशयित आरोपीचा शोध सुरू होता. त्याच्या अटकेसाठी पोलीस निरीक्षक जे. एम. कालीमिर्ची यांच्या नेतृत्वाखाली माळमारुती पोलिसांचे पथक चार दिवसांपासून निपाणी, मिरज, सांगली, सातारा परिसर पिंजून काढत होते. अखेर गेल्या सोमवारी रात्री त्याला निपाणी येथे अटक करण्यात आली. प्रेयसीला भेटायला आला असताना नागराजने मारहाण केल्यामुळे आपण त्याचा खून केला असल्याची कबुली मुख्य आरोपी अक्षय उर्फ आकाश साळुंखे याने दिली आहे.

त्याची जिल्हा इस्पितळात वैद्यकीय तपासणीनंतर करून न्यायालयासमोर हजर केले असता त्याची रवानगी न्यायालयीन कोठडीत हिंडलगा कारागृहामध्ये करण्यात आली आहे.