प्रज्वल रेवण्णा विरोधात ब्लू कॉर्नर नोटीस जारी; गृहमंत्री परमेश्वर यांची माहिती

बंगळूर : हसनचे खासदार प्रज्वल रेवण्णा अश्लील व्हिडिओ प्रकरणात आणखी अडचणीत आले आहेत, या प्रकरणाचा तपास करत असलेल्या एसआयटीच्या विनंतीनंतर सीबीआयने प्रज्वलविरुद्ध ब्लू कॉर्नर नोटीस जारी केली आहे.
राज्याचे गृहमंत्री जी. परमेश्वर यांनी याबाबत माध्यमांना माहिती दिली, लैंगिक छळ आणि अपहरणाचा आरोप असलेल्या प्रज्वल रेवन्ना सेक्स स्कँडलचा शोध घेण्यासाठी यापूर्वीच ब्लू कॉर्नर नोटीस जारी करण्यात आली आहे. ते म्हणाले की, राज्य सरकारने या प्रकरणाचा तपास करण्यासाठी विशेष तपास पथकाला (एसआयटी) पूर्ण स्वातंत्र्य दिले आहे.
एसआयटी कार्यपद्धतीनुसार काम करत आहे आणि निष्पक्ष तपास केला जाईल. निष्पक्ष तपासासाठी आम्ही एसआयटीला पूर्ण स्वातंत्र्य दिले आहे. ते आधीच त्या कामावर आहेत. प्रज्वल रेवण्णा फरार झाले असल्याबद्दल विचारले असता, ब्लू कॉर्नर नोटीस जारी करण्यात आल्याचे सांगून ते म्हणाले, “हे खरे आहे की त्याना शोधण्यासाठी ब्लू कॉर्नर नोटीस जारी करण्यात आली आहे. संबंधित अधिकारी त्यांचा शोध घेतील. त्यांना देशात परत आणण्यासाठी आम्ही प्रयत्नशील आहोत. सर्व प्रक्रियेचे पालन करून त्यांना भारतात आणण्यासाठी एसआयटी सर्वतोपरी प्रयत्न करत आहे,” अशी माहिती त्यांनी दिली.
ही ब्लू कॉर्नर नोटीस इंटरपोल कलर-कोडेड नोटिसचा भाग आहे जी “देशांना जगभरातील माहितीसाठी सूचना आणि विनंत्या [वॉन्टेड व्यक्ती/गुन्हे] सामायिक करण्यास सक्षम करते आणि तपासांना मदत करते.”
त्याचप्रमाणे, प्रज्वल रेवण्णा यांच्याविरोधात सीबीआय ‘ब्लू कॉर्नर नोटीस’ जारी करण्याच्या शक्यतेबद्दल एसआयटी अधिकाऱ्यांनी मुख्यमंत्री सिद्धरामय्या यांना आधीच माहिती दिली आहे. प्रज्वल विरुद्धच्या खटल्यांबाबत मुख्यमंत्र्यांनी शनिवारी एसआयटी अधिकाऱ्यांसोबत बैठक घेतली, त्यादरम्यान सिद्धरामय्या यांनी अधिकाऱ्यांना प्रज्वलला अटक करण्यासाठी तातडीने कारवाई करण्याचे निर्देश दिले. प्रज्वलला अटक करून त्याला लवकरच परत आणण्याचे आश्वासन अधिकाऱ्यांनी दिल्याचे सांगण्यात येते.
प्रज्वल रेवण्णा सलग नोटीस देऊनही सुनावणीला गैरहजर होते
सेक्स स्कँडलच्या संदर्भात प्रज्वल रेवण्णा यांना मंगळवारी नोटीस, गुरुवार आणि शुक्रवारी लुकआउट नोटीस बजावण्यात आली होती, परंतु प्रज्वल एसआयटीसमोर हजर झाले नाहीत. २७ एप्रिल रोजी ते जर्मनीला रवाना झाल्याचे सांगण्यात येत आहे. डिप्लोमॅटिक पासपोर्ट असलेल्या प्रज्वलला परदेशात जाण्यासाठी व्हिसाची गरज नाही.
पहिली नोटीस बजावल्यानंतर खासदाराने आपल्या वकिलामार्फत एसआयटीसमोर हजर राहण्यासाठी एका आठवड्याची मुदत मागितली होती. मात्र, त्यांचा अर्ज फेटाळण्यात आला. प्रज्वलने १५ मे रोजी म्युनिच ते बंगळुरचे परतीचे तिकीट बुक केले आहे आणि १६ मे रोजी पहाटे ते बंगळुरला पोहोचतील.