Belgaum Varta Belgaum Varta
बेळगाव : संपूर्ण जगाला प्रभावित करणाऱ्या कोविडच्या पहिल्या आणि दुसऱ्या लाटेचा बेळगाव जिल्ह्यात आपण प्रभावीपणे सामना केला आहे. गेल्या वेळच्या घटनांची पुनरावृत्ती होऊ नये यासाठी जिल्हा प्रशासनाने जेएन-1 कोविड म्युटंट स्ट्रेनचा सामना करण्यासाठी सर्व तयारी केली आहे, असे जिल्हाधिकारी नितेश पाटील यांनी सांगितले.
बेळगावातील बीम्स संस्थेच्या सभागृहात गुरुवारी आरोग्य विभागाच्या अधिकाऱ्यांसोबत कोविडसंदर्भात बैठक घेतल्यानंतर पत्रकारांशी बोलताना जिल्हाधिकारी नितेश पाटील म्हणाले की, बीम्स हॉस्पिटलमध्ये 908 कोविड ऑक्सिजन बेड आहेत. 78 व्हेंटिलेटर आहेत. सर्व काही कार्यरत आहे. कर्मचार्यांना भूतकाळातील कोविड व्यवस्थापनाचा अनुभव आहे, असे ते म्हणाले. महाराष्ट्र आणि गोव्याच्या सीमेवरील चेकपोस्टवर तपासणीबाबत शासनाच्या नियमांचे काटेकोरपणे पालन केले जाईल. कोविड किट उपलब्ध करून देण्याबाबत सरकारला आधीच पत्र लिहिले आहे. ते लवकरच येईल, असे ते म्हणाले.
आमदार राजू उर्फ आसिफ सेठ म्हणाले, जिल्ह्यात गेल्या वेळी झालेल्या मृत्यू आणि वेदना लक्षात घेऊन यावेळी कोविड विरोधात खबरदारीचा उपाय म्हणून प्राथमिक बैठक घेण्यात आली. बेळगाव जिल्ह्यातील जनतेने काळजी करण्याची गरज नाही. सीमेवर अधिक सतर्कता बाळगण्याचा तसेच, आणखी कोविड तपासण्या करण्याचा निर्णय घेतला आहे. केरळमध्ये कोविड संसर्गाचे प्रमाण वाढले आहे. जिल्ह्यात तसेच शहरात खबरदारीच्या उपाययोजना करणे आवश्यक आहे. बिम्समधील डॉक्टरांची कमतरता यापूर्वीच सरकारच्या निदर्शनास आणून दिली आहे. सरकार लवकरात लवकर कर्मचाऱ्यांची नियुक्ती करेल, असा विश्वास त्यांनी व्यक्त केला. गेल्या वेळी रुग्णांची संख्या वाढली होती, आमच्याकडे खबरदारीच्या उपाययोजना करण्यासाठी आवश्यक औषधे नव्हती, सीमेवर खबरदारी कशी घ्यावी यावर आम्ही चर्चा केली, औषधांचा साठा आहे, कोविड टेस्टिंग किट, बेडची व्यवस्था पूर्णपणे तयार आहे. आम्ही सरकारकडे दाद मागितली आहे, असे ते म्हणाले.या बैठकीत महानगरपालिकेचे आयुक्त अशोक दुडगुंटी, डीएचओ महेश कोणी, बीम्स संचालक अशोक शेट्टी आणि इतर अधिकारी सहभागी झाले होते.
