क्लब रोडला माजी केंद्रीय मंत्री बी. शंकरानंद नाव द्या

बेळगाव महापालिकेच्या बैठकीत मागणी…

बेळगाव : बेळगाव महापालिकेत आज बैठक बोलावण्यात आली होती. बैठकीत विविध महत्त्वाच्या मुद्द्यांवर चर्चा करण्यात आली. बेळगाव महापालिकेत आज महापौर सविता कांबळे यांच्या अध्यक्षतेखाली परिषदेची बैठक बोलावण्यात आली होती.
सभेच्या सुरुवातीलाच मराठी नगरसेवकांनी सभेच्या नोटिसा, तसेच अधिसूचना व इतर कागदपत्रे कन्नड भाषेत तसेच मराठी भाषेत द्यावीत, अशी मागणी केली. यावेळी कर्नाटकात कन्नड ही राजभाषा असून सर्व पत्रिका कन्नडमध्ये दिल्या जातात, असे त्यांनी सांगितले. उदय कुमार यांनीही शासनाच्या आदेशाचे वाचन केले. यावर आक्षेप घेणाऱ्या मराठी नगरसेवकांनी सुरुवातीपासूनच बेळगाव महापालिकेत कन्नडसह मराठी भाषेत पत्रिका काढल्या होत्या. गेल्या बैठकीतही मराठी परिपत्रके देण्याचा निर्णय झाला होता, मात्र आजपर्यंत ती का दिली गेली नाही, असा सवाल त्यांनी केला. यावेळी बेळगाव शहरातील कन्नड, मराठी व इतर भाषिकही एकोप्याने राहत आहेत. पत्रिकेचे मराठीतही भाषांतर करावे, अशी सूचना त्यांनी केली. संबंधित अधिकाऱ्यांनी कारवाई करावी, असेही आमदार आसिफ सेठ म्हणाले.

दरम्यान, विरोधी पक्षनेते मुझम्मील डोणी यांनी महापालिकेतील उर्दू सदस्यांची संख्या वाढली असून, उर्दू भाषेतही पत्रके द्यावीत, अशी मागणी केली. त्याला उत्तर देताना महापौर सविता कांबळे म्हणाल्या की, मी कोणत्याही भाषेचा द्वेषी नाही. गेल्या बैठकीत मराठी भाषेतही पत्रके देणार असल्याचे त्यांनी सांगितले.

माजी केंद्रीय मंत्री बी शंकरानंद यांच्या जन्मशताब्दीनिमित्त नगरसेवक संदीप जिराग्याळ यांनी बेळगावमधील क्लब रोडला बी. शंकरानंद मार्ग असे नाव देण्याची व त्यांचा पुतळा बसविण्याची विनंती सभागृहाच्या बठकीत केली. यावेळी नामनिर्देशित सदस्य रमेश सोनटक्की यांनी क्लब रोडला इतर कोणाचे नाव असल्यास आधी खातरजमा करून त्यांचे नाव ठेवावे, अशी सूचना केली. त्यावर उत्तर देताना लक्ष्मी निपाणीकर यांनी याप्रकरणी लक्ष घालून कारवाई करणार असल्याचे सांगितले. तसेच शाहूनगर-आझम नगर स्वागत कमान वादाचे पडसाद सभेत उमटले. नगरसेवक श्रेयस नाकाडी व आमदार आसिफ सेठ यांच्यात वादावादी सुरू असताना नगरसेवक रवी धोत्रे व अन्य भाजप सदस्यांनी आवाज उठवला. आमदार आसिफ सेठ यांना आधी चक्कबंदी दुरुस्त करून मगच कमानीचे काम पुढे करायचे होते. मात्र प्रभाग विभागणी करताना निश्चित करण्यात आलेली चक्कबंदी भाजप सदस्यांना ग्राह्य धरायची असल्याने वाद निर्माण झाला. नामनिर्देशित नगरसेवक रमेश सोनटक्की यांनी मध्यस्थी करून स्थानिकांचे मत आणि साधकबाधक विचार करून कार्यवाही करावी, अशी सूचना केली. नामनिर्देशित सदस्य दिनेश नाशिपुडी यांनी जुन्या लाभार्थ्यांची नावे काढून मनपाच्या योजनांसंदर्भात इतरांची नावे जोडल्याचा मुद्दा उपस्थित केला. यावेळी नियामक मंडळाचे सदस्य आणि नामनिर्देशित नगरसेवकांमध्ये वादावादी झाली. याबाबत कार्यवाही करण्यात येईल, असे अभियंता लक्ष्मी निपाणीकर यांनी सांगितले.