बेळगावात आणखी एक बालक विक्री प्रकरण उघडकीस; तीन आरोपींना अटक

बेळगाव : अलीकडे मुलांच्या विक्रीचे प्रकरण खूप गाजत आहे. हुक्केरी तालुक्यातील सुलतानपूर येथील पाच वर्षांच्या मुलाची विक्री केल्याचा गुन्हा हुक्केरी पोलिसांनी उकरून काढला असून महाराष्ट्रातील तीन आरोपींना अटक केली आहे.

कोल्हापूर जिल्ह्यातील गडहिंग्लज तालुक्यातील मड्याळ येथील संगीता हमण्णावर, रत्नागिरी जिल्ह्यातील चिपळूण तालुक्यातील निवली येथील मोहन तावडे आणि त्यांची पत्नी संगीता तावडे यांना अटक करण्यात आली आहे. अन्य दोघांचा शोध सुरू आहे.

राजू मगदूमसोबत दुसरे लग्न करणाऱ्या अर्चनाला पहिल्या लग्नापासून एक मुलगा झाला. ते आजारी बाळ टोळीचे लक्ष्य बनले. वैद्यकीय उपचाराची व्यवस्था करू, असे सांगून तावडे दाम्पत्याने अर्चनाला मुलाला महाराष्ट्रातील गडहिंग्लज येथे पाठवण्यास सांगितले. मात्र, बाळाला मदत करण्याऐवजी या दाम्पत्याने गडहिंग्लज येथील संगीता गोवळी हिच्या राहत्या घरी त्या बाळाला दोराळेकर कुटुंबाला 3.5 लाख रुपयांना विकले. त्यानंतर आरोपींनी विक्रीतून मिळालेली रक्कम वाटून घेतली. ही पहिलीच घटना नसून आठवड्याभरापूर्वी संगीता नावाची आणखी एक विधवाही याच टोळीची शिकार झाली होती. तिचे दुसरे लग्न ठरल्यानंतर आधीच्या लग्नातील तिचे पहिले जन्मलेले अपत्य 4 लाख रुपयांना विकले गेले.

हुक्केरी पोलिसांनी यापूर्वी सदर घटनेशी संबंधित चार जणांना अटक केली आहे. आपल्या कर्तव्यदक्ष तत्पर पथकाच्या नेतृत्वाखाली हुक्केरी पोलिसांनी दोन्ही घटनांमध्ये गुन्हे दाखल केले आहेत आणि उर्वरित संशयितांचा कसून शोध घेतला जात आहे.