बेळगावमध्ये नव्या आरटीओ इमारतीचे उद्घाटन

बेळगाव : बेळगावच्या आरटीओ चौकात उभारण्यात आलेल्या संयुक्त परिवहन आयुक्त कार्यालय आणि प्रादेशिक परिवहन अधिकारी कार्यालयाच्या नवीन इमारतीचा लोकार्पण सोहळा मोठ्या उत्साहात पार पडला. उत्तरचे आमदार आसिफ सेठ यांच्या अध्यक्षतेखाली झालेल्या या कार्यक्रमात परिवहन मंत्री रामलिंगा रेड्डी, जिल्हा पालकमंत्री आणि सार्वजनिक बांधकाम मंत्री सतीश जारकीहोळी, महिला व बाल विकास मंत्री लक्ष्मी हेब्बाळकर, बैलहोंगलचे आमदार महांतेश कौजलगी, बुडा अध्यक्ष लक्ष्मणराव चिंगळे, सरकारचे मुख्य सचेतक अशोक पट्टण, हमी योजना अंमलबजावणी समितीचे अध्यक्ष विनय नावलगट्टी, जिल्हा पंचायत मुख्य कार्यकारी अधिकारी राहुल शिंदे, शहर पोलीस आयुक्त भूषण बोरासे, अपर परिवहन आयुक्त के. टी. हालाप्पा, बेळगाव संयुक्त परिवहन आयुक्त एम. पी. ओमकारेश्वरी, प्रादेशिक परिवहन अधिकारी नागेश मुंडास यांच्यासह इतर मान्यवरांच्या उपस्थितीत नवीन कार्यालयाच्या इमारतीचे लोकार्पण करण्यात आले.

यावेळी बोलताना जिल्हा पालकमंत्री आणि सार्वजनिक बांधकाम मंत्री सतीश जारकीहोळी यांनी सांगितले की, परिवहन, उत्पादन शुल्क आणि कर विभाग हे महसूल मिळवून देणारे विभाग आहेत. मुख्यमंत्री सिद्धरामय्या आणि परिवहन मंत्री रामलिंगा रेड्डी यांनी पुढाकार घेऊन जनतेला उत्तम सेवा देण्याच्या उद्देशाने नवीन इमारत बांधली आहे, ज्यामुळे परिवहन विभाग नव्या दिशेने वाटचाल करत आहे. आणखी योजना लागू करून त्याला नवसंजीवनी देण्याची गरज आहे. वाहनचालक आणि मालकांना प्रशिक्षण देणे, तसेच वाहन परवाने देण्याबाबत कठोर उपाययोजना करायला हव्यात. अनेक ठिकाणी अपघातप्रवण क्षेत्रे असून, सार्वजनिक बांधकाम आणि पोलीस विभागासोबत परिवहन विभागानेही ती दूर करण्यासाठी पुढाकार घ्यावा. बेळगाव आणि चिक्कोडी विभागाला २०० बस देऊन आणि बस डेपो बांधून कमतरता दूर करावी, तसेच शालेय विद्यार्थी आणि ग्रामीण जनतेच्या हिताचे रक्षण करावे, अशी विनंती त्यांनी बेळगाव जिल्ह्याच्या वतीने मंत्र्यांना केली. तसेच, १५ वर्षांपेक्षा जुनी वाहने प्रतिबंधित करावीत आणि परवाना नसताना वाहन चालवणाऱ्यांवर कारवाई करावी, असेही ते म्हणाले. मोठ्या आवाजात गाणी वाजवून ट्रॅक्टरसह इतर वाहने चालवणाऱ्यांवर, बाईक व्हीलिंग करणाऱ्यांवर आणि कर्कश आवाजाची वाहने चालवणाऱ्यांवर कारवाई करायला हवी, असेही त्यांनी नमूद केले.

महिला व बाल विकास मंत्री लक्ष्मी हेब्बाळकर यांनी यावेळी सांगितले की, बेळगाव जिल्हा खूप मोठा असल्याने परिवहन विभागाने जनतेला त्वरित प्रतिसाद दिला पाहिजे. रामलिंगा रेड्डी परिवहन मंत्री झाल्यापासून परिवहन विभागात अनेक बदल दिसून येत आहेत. बेंगळुरूनंतर बेळगाव हा सर्वात मोठा जिल्हा असल्याने, परिवहन मंत्र्यांनी याकडे विशेष लक्ष द्यावे, अशी विनंती त्यांनी केली. यावेळी, “हमी योजनांमुळे विकास होत नाही” या भाजपच्या विधानाला प्रत्युत्तर देताना मंत्र्यांनी सांगितले की, बेळगाव आणि बैलहोंगलमध्ये शक्ती योजनेसह १० कोटी रुपये खर्चून नवीन परिवहन कार्यालये बांधणे हे विकासाचे प्रतीक आहे.यावेळी वाकसा संस्थेचे व्यवस्थापकीय संचालक प्रियांग एम., अपर परिवहन आयुक्त बी. पी. उमा शंकर यांच्यासह इतर मान्यवर उपस्थित होते.