निपाणीतून काकासाहेब पाटीलच काँग्रेसचे उमेदवार

माजी मंत्री वीरकुमार पाटील : काँग्रेस कार्यकर्त्यांचा मेळावा
निपाणी (वार्ता) : कार्यकर्ते व नेते मंडळी एक झाल्यामुळेच निपाणी विधानसभा मतदारसंघातून काकासाहेब पाटील यांनी तीन वेळा निवडून येण्याचा मान मिळवला. याशिवाय त्यांनी आजतागायत पक्षाशी एकनिष्ठ राहून कार्य केले आहे. आताही नेते मंडळी व कार्यकर्ते सर्वजण त्यांच्याबरोबरच कार्यरत आहेत. त्यामुळे आगामी विधानसभा निवडणुकीत काकासाहेब पाटील हेच निवडणूक रिंगणात असल्याची घोषणा माजी मंत्री वीरकुमार पाटील यांनी केली. बुधवारी (ता.७) येथील मराठा मंडळ सांस्कृतिक भवनात आयोजित कार्यकर्त्यांच्या मेळाव्यात अध्यक्ष स्थानावरून बोलताना त्यांनी ही घोषणा केली. त्यामुळे उपस्थित हजारो कार्यकर्त्यांनी टाळ्यांचा गजर केला.
माजी मंत्री वीरकुमार पाटील म्हणाले, नागरिकांच्या अफवांवर विश्वास न ठेवता कार्यकर्त्यांनाच ही निवडणूक हाती घ्यावी लागली आहे. निवडणुकीत कोणत्याही प्रकारची अपेक्षा न करता निवडणुकीनंतर सर्वच जनतेची कामे होणार आहेत. आतापासूनच रणांगणाला सुरुवात झाली असून निवडणुकीसाठी केवळ नऊ महिने शिल्लक आहेत. म्हणून कार्यकर्त्यांनी एकसंघपणे काँग्रेसच्या बळकटीसाठी प्रयत्न करण्याचे आवाहन त्यांनी केले.
आमदार काकासाहेब पाटील यांनी, आपल्या जीवनात आपण तीन वेळा विधानसभा निवडणुकीत बाजी मारली आहे. कार्यकर्त्यांची अवहेलना लक्षात घेऊन आपण या निवडणुकीतून माघार घेतली होती. पण कार्यकर्त्यांची मागणी व मेळाव्याला झालेली गर्दी पाहून आपला विश्वास आणि आदर दुनावला आहे. माजी मंत्री वीरकुमार पाटील आणि पक्षाने घेतलेल्या निर्णयाशी आपण बांधील असल्याचे स्पष्ट केले. यावेळी सर्वच कार्यकर्त्यांनी आपले हात उंचावून आगामी निवडणुकीत काकासाहेब पाटील हेच उमेदवार असावेत अशी एक संघपणे मागणी केली.
माजी जिल्हा पंचायत उपाध्यक्ष पंकज पाटील, सदस्य राजेंद्र वडर, निपाणी काँग्रेस अध्यक्ष राजेश कदम, बेडकिहाळ भाग अध्यक्ष बसगोंडा पाटील, युवा नेते रोहन साळवे यांनी, विधानसभा निवडणुकीत काकासाहेब पाटील हेच उमेदवार असावेत. निपाणी मतदारसंघातील सर्व काँग्रेस कार्यकर्ते व नेते त्यांच्या पाठीशी खंबीर उभे असल्याचे सांगितले. यावेळी शाहिदा मुजावर, सुनील कांबळे, किरण कोकरे, नवनाथ चव्हाण, अशोक लाखे, अण्णासाहेब हावले, असलम शिकलगार, अवधूत गुरव, प्रमोद पाटील,इरफान बागवान, सचिन हेगडे, बबन चौगुले, अमोल बन्ने, सचिन लोकरे, दिपाली जाधव, विद्या देसाई, के. डी. पाटील, अभिजीत बोधले यांच्यासह ४५ कार्यकर्त्यांनी आपल्या भावना व्यक्त केल्या.
मेळाव्यास दत्तकुमार पाटील, माजी सभापती विश्वास पाटील, माजी नगराध्यक्ष विजय शेटके, निकु पाटील, बबन घाटगे, बाबुराव खोत, अरुण आवळेकर, केतन बोरगावे, नगरसेवक दिलीप पठाडे, शौकत मनेर, संजय पावले, दत्ता नाईक, दीपक सावंत, राजकुमार सावंत, अरुण निकाडे यांच्यासह निपाणी मतदारसंघाचे काँग्रेस कार्यकर्ते उपस्थित होते. श्रीनिवास संकपाळ यांनी सूत्रसंचालन केले. युवराज पोळ यांनी आभार मानले.