बालिकांवरील अत्याचाराचा मराठी विद्यानिकेतनमध्ये निषेध!

बेळगाव : मराठी विद्यानिकेतन बेळगाव शाळेमध्ये आज 24 ऑगस्ट रोजी कोलकत्ता व महाराष्ट्र या ठिकाणी शाळकरी मुलींच्या वर झालेल्या अत्याचाराचा सर्व विद्यार्थ्यांनी व शाळेतील शिक्षक व शिक्षकेतर कर्मचाऱ्यांनी संपूर्ण दिवसभर काळ्या फिती बांधून व काळे कपडे परिधान करून या घटनेचा निषेध केला. सध्या वाढत असलेल्या लैंगिक अत्याचारांच्या घटना आपल्या देशासमोरील खूप भयंकर घटना असून या घटना तात्काळ थांबवाव्यात. त्याचबरोबर लहान मुले व विद्यार्थ्यांना सुरक्षा पुरवावी व त्यांच्या सुरक्षिततेची काळजी घ्यावी असे निवेदन शाळेचे अध्यक्ष सुभाष ओऊळकर यांनी यावेळी केले. यावेळी शाळेचे मुख्याध्यापक गजानन सावंत, एन सी उडकेकर, संयोजक नीला आपटे सर्व शिक्षक व शिक्षकेतर कर्मचारी उपस्थित होते. विद्यार्थ्यांनी मानवी साखळी करून या सर्व घटनेचा निषेध नोंदवला. यावेळी मोठ्या प्रमाणात पालकही उपस्थित होते.