शांताई विद्या आधारला भरतेश संस्थेकडून मदत

बेळगाव : जुनी पुस्तके आणि वर्तमानपत्रे (रद्दी) विकून वंचित विद्यार्थ्यांना शिक्षणासाठी मदत करण्यास समर्पित असलेल्या शांताई विद्या आधार या उपक्रमाला भरतेश संस्थांकडून पुन्हा एकदा पाठिंबा मिळाला असून सामाजिक कार्यांप्रती असलेल्या आपल्या वचनबद्धतेचे पालन करत भरतेशने विद्या आधारकडे रद्दीचा मुबलक संग्रह सुपूर्द केला.

कार्यक्रमाप्रसंगी भरतेश एज्युकेशन ट्रस्टचे सचिव विनोद एस. दोड्डानवर, बीईटीस ग्लोबल बिझनेस स्कूलचे अध्यक्ष शरद बालिकाई, पी. ए. भरतेश कॉलेज ऑफ बिझनेस ॲडमिनिस्ट्रेशनचे संचालक डॉ. प्रशांत कांबळे, पी. ए. भरतेश होमिओपॅथिक मेडिकल कॉलेजचे प्राचार्य डॉ. श्रीकांत कोकणी प्राचार्य, एस. जे. डी भारतेश सेंट्रल स्कूलच्या अध्यक्ष अनुपमा शिरहट्टी, भरतेश सेंट्रल स्कूल मुख्याध्यापिका इंदिरा पाटील आणि भरतेश एज्युकेशन ट्रस्टच्या पीआरओ अनुराधा तिगडी यांनी संस्थेत जमा झालेली रद्दी शांताई विद्या आधार उपक्रमासाठी देऊ केली.

याप्रसंगी शांताई विद्या आधारचे अध्यक्ष विनायक बोंगाळे, गंगाधर पाटील, ॲलन विजय मोरे, विश्वास विजय पाटील, सूरज गवळी आदी उपस्थित होते. त्यांनी रद्दी ताब्यात घेऊन भरतेशच्या सततच्या पाठिंब्याबद्दल त्यांचे आभार मानण्याबरोबरच समाजाने गरजू विद्यार्थ्यांच्या मदतीसाठी असलेल्या शांताई वृद्धाश्रमाच्या विद्या आधार उपक्रमासाठी रद्दीच्या स्वरूपात अधिकाधिक मदत करण्याचे आवाहन केले.