बेळगाव येथे राज्यस्तरीय ज्युडो स्पर्धेचे भव्य उद्घाटन

बेळगाव : राज्यस्तरीय ज्युडो अजिंक्यपद स्पर्धेचे आज गांधी भवन, बेळगाव येथे भव्य उद्घाटन करण्यात आले. उद्घाटन पोलीस उपायुक्त श्री. नारायण बरमणी आणि सुप्रसिद्ध मिस्टर आशिया बॉडी बिल्डर श्री. सुनील आपटेकर यांच्या हस्ते पार पडले.

ही स्पर्धा बेळगाव ॲमॅच्युअर ज्युडो असोसिएशनच्या पुढाकाराने आणि अध्यक्षा डॉ. सोनाली सरनोबत व उपाध्यक्ष डॉ. प्रकाश मुगळी यांच्या नेतृत्वाखाली आयोजित करण्यात आली आहे. यामध्ये राज्य ज्युडो संघटनेचे अध्यक्ष श्री. आनंद व सचिव श्री. रविकुमार यांचे सहकार्य लाभले आहे.

उद्घाटन कार्यक्रम प्रसंगी उपाध्यक्ष श्री. बसवराज कडली, उपाध्यक्ष श्री. लक्ष्मण अडिहुडी, सहसचिव पूजा गावडे, खजिनदार श्री. प्रमोद सुर्यवंशी, कार्यकारी सदस्य, श्री. संतोष कांग्राळकर, तांत्रिक समिती कु. भैरवी मुजुमदार, प्रशिक्षक व समन्वयक कु. रोहिणी पाटील, प्रशिक्षक त्रिवेणी उपस्थित होते.

कार्यक्रमाची सुरुवात दीपप्रज्वलनाने करण्यात आली, ज्यातून ज्ञान आणि क्रीडासंस्काराचे प्रतीक दर्शवले गेले. ज्युडो कलेवर आधारित एक नृत्यनाटिका सादर करण्यात आली, ज्यात कलेचा आणि खेळाचा सुंदर संगम घडवण्यात आला.

या स्पर्धेसाठी राज्यातून ५०० हून अधिक स्पर्धक, पंच आणि प्रशिक्षक सहभागी झाले आहेत. खेळाडूंसाठी मोफत निवास व भोजनाची व्यवस्था आयोजकांनी केली असून, त्यामुळे युवकांमध्ये क्रीडाप्रती उत्साह वाढवण्याचा उद्देश साधला गेला आहे.

उद्घाटन प्रसंगी बोलताना डीसीपी नारायण बरमणी यांनी स्पर्धकांना उद्देशून शिस्त, समर्पण आणि चिकाटीचे महत्त्व अधोरेखित केले. स्पर्धेचा समारोप रविवारी होणार असून विजेत्यांचा गौरव करण्यात येईल. ही स्पर्धा शक्ती, कौशल्य आणि क्रीडासंस्कृतीचा उत्सव ठरणार असून, बेळगाव हे ज्युडो आणि मार्शल आर्ट्सच्या क्षेत्रात पुन्हा एकदा अग्रस्थानी आले आहे.