Belgaum Varta Belgaum Varta
बेळगाव : राष्ट्रीय स्वयंसेवक संघाने बेळगाव शहरात आज शिस्तबद्ध आणि भव्य पथसंचलनाचे आयोजन केले होते. शहर परिसरातील हजारो स्वयंसेवकांनी यात उत्स्फूर्त सहभाग घेतला.
सरदार हायस्कूलच्या मैदानावरून या भव्य संचलनाची सुरुवात करण्यात आली. संचलनाच्या अग्रभागी विशेषतः सुशोभित केलेल्या वाहनावर संघाचे संस्थापक डॉ. केशव बळीराम हेडगेवार आणि दुसरे सरसंघचालक माधवराव गोळवलकर (गुरुजी) यांच्या प्रतिमा ठेवण्यात आल्या होत्या.
संपूर्ण संचलन मार्गावर जागोजागी स्वागत कमानी उभारण्यात आल्या होत्या. भगवे ध्वज आणि पताका सर्वत्र फडकत असल्याने, बेळगावात राष्ट्रभक्तीचे एक उत्सवपूर्ण आणि मंगलमय वातावरण तयार झाले होते. संचलन पाहण्यासाठी रस्त्यांच्या दुतर्फा नागरिकांनी मोठी गर्दी केली होती.रस्त्यावर उपस्थित असलेल्या नागरिकांनी ‘वंदे मातरम’, ‘जय श्रीराम’ आणि ‘भारत माता की जय’ यांसारख्या जयघोषात स्वयंसेवकांचे स्वागत केले. स्थानिक नागरिक आणि युवक मंडळांनी अनेक ठिकाणी पुष्पवृष्टी करून या स्वयंसेवकांना प्रोत्साहित केले.
या संचलनातील घोष पथकांचे प्रभावी प्रदर्शन आणि स्वयंसेवकांनी पाळलेली अचूक शिस्त नागरिकांचे लक्ष वेधून घेत होती. शहरातील विविध महत्त्वाच्या मार्गांवरून संचलनाचे मार्गक्रमण झाल्यानंतर अखेरीस लिंगराज कॉलेजच्या मैदानावर सांगता झाली.
