ननदी येथील श्री हालसिद्धनाथ यात्रा 16 ते 21 एप्रिलपर्यंत

ननदी (प्रतिनिधी) : चिकोडी तालुक्यातील ननदी येथील जागृत देवस्थान ग्रामदैवत व कर्नाटक – महाराष्ट्र सीमाभागातील भाविकांचे श्रद्धास्थान श्री हालसिद्धनाथ देवाची यात्रा बुधवार दिनांक 16 रोजी सायंकाळी आठ वाजता श्रीमंत सरकार अजितसिंह निंबाळकर यांच्या नेतृत्वाखाली व विजयसिंह निंबाळकर व विजयसिंह देसाई यांच्या मार्गदर्शनाखाली कर बांधून सुरुवात करण्यात आली. यात्रेचा मुख्य दिवस दिनांक 19 एप्रिल रोजी सकाळी 11 वाजता आंबील घागर मिरवणूक व त्यानंतर नाथांची विधिवत धार्मिक पूजन व महाप्रसादाने होणार आहे. तर दिनांक 20 रोजी पहाटे कृष्णा डोने वाघापूरकर यांच्याकडून व सचिन पुजारी ननदी यांच्याकडून नाथांची भाकणूक होणार आहे व महानैवेद्याचा कार्यक्रम होईल. तसेच दिनांक 21 रोजी सायंकाळी नाथांची पालखी प्रदक्षणा भंडाऱ्याची उधळण व नारळ उडवण्याचा कार्यक्रम होणार असून यात्रेची सांगता होणार आहे. दरम्यानच्या काळात ढोल वाजून स्पर्धा धनगरी ओव्यांचा कार्यक्रम तसेच घोडा गाडी बैलगाडी इत्यादी शर्यती व विविध मनोरंजनाचे कार्यक्रम होणार आहे. दरम्यान यात्रेमध्ये यात्रेकरूंची व व्यापाऱ्यांची गैरसोय होऊ नये म्हणून यात्रा कमिटी व ग्रामपंचायत ननदी यांच्याकडून चोख व्यवस्था ठेवण्यात आले आहे.