कर्नाटकात कांही सवलतीसह लॉकडाऊन निर्बंध कायम

मुख्यमंत्र्यांची घोषणा : निर्यात संबंधीच्या व्यवसायांना परवानगी
बंगळूरू : राज्यातील लॉकडाऊनच्या भविष्याविषयी असलेल्या कटाक्षांच्या पार्श्वभूमीवर मुख्यमंत्री बी. एस. येडियुराप्पा यांनी बुधवारी कांही कडक उपाययोजना सुरूच राहणार असल्याचे स्पष्ट केले. कोरोनाव्हायरस पूर्णपणे नियंत्रणाखाली आला नाही आणि ग्रामीण भागात अजूनही प्रकरणे जास्त असल्याचे त्यांनी सांगितले. तथापि, त्यांनी कांही क्षेत्राना सवलत देण्यात येणार असल्याचे संकेत देऊन गुरुवारपासून निर्यातीवर आधारीत व्यवसायांना परवानगी दिली जाईल, असे त्यांनी जाहीर केले आहे.
राज्यात सध्या 7 जूनपर्यंत लॉकडाऊन आहे, आणि तो वाढविला जाण्याची शक्यता आहे. लॉकडाऊन संदर्भात कोणत्या उपाययोजना कराव्या लागतील त्याबाबत निर्णय घेण्यासाठी मी सर्वांशी चर्चा करेन. मुख्य म्हणजे निर्यातीत गुंतलेल्यांना परवानगी देण्याचे मी ठरविले आहे. त्यामुळे गुरुवार (ता.3) पासून निर्यातभिमुख व्यवसायाला परवानगी दिली जाईल, असे येडियुराप्पा म्हणाले.
पत्रकारांशी बोलताना ते म्हणाले की, ते वरिष्ठ मंत्री आणि अधिकार्‍यांशी संबंधित इतर बाबींवर चर्चा करतील आणि आज किंवा उद्या या लॉकडाऊनबाबत निर्णय घेतील. लॉकडाऊन वाढवून कडक उपाययोजना करण्यात येतील. तज्ञांच्या सूचनांची कोणत्याप्रकारे अंमलबजावणी करता येईल याविषयी चर्चा करू. कोरोनाव्हायरस पूर्णपणे नियंत्रणाखाली आलेला नाही, अजूनही ग्रामीण भागात हे प्रमाण जास्त आहे. आम्ही गोष्टी कशा संतुलित करायच्या यावर एक निर्णय घेऊन पुढे जाण्याचा विचार करू, असे ते म्हणाले.
मुख्यमंत्र्यांनी बुधवारी संध्याकाळी तज्ज्ञ, वरिष्ठ मंत्री आणि अधिकार्‍यांसमवेत स्वतंत्र बैठका घेऊन चर्चा केली. राज्यातील कोविड-19 तांत्रिक सल्लागार समितीने (टीएसी) सरकारला दिलेल्या अहवालात नमूद केले आहे की, सकारात्मकता दर 5 टक्क्यांच्या खाली आला पाहिजे आणि प्रकरणांची संख्या 5,000 च्या खाली असावी, तरच निर्बंध शिथील करता येतील. राज्य सरकारने सुरुवातीला 27 एप्रिलपासून 14 दिवस क्लोजडाऊन जाहीर केले होते, परंतु त्यानंतर कोविड प्रकरणे सातत्याने वाढत राहिल्याने 10 ते 24 मे दरम्यान संपूर्ण लॉकडाऊन लागू केले. लॉकडाऊन परिणाम आणि तज्ञांच्या सल्ल्याचा हवाला देऊन तो पुन्हा 7 जूनपर्यंत वाढविण्यात आला.
दुसरे पॅकेज दोन दिवसात
दुसर्‍या लॉकडाऊन मदत पॅकेजेसंदर्भात एका प्रश्नाला उत्तर देताना मुख्यमंत्री म्हणाले की, दोन दिवसांत आपण यावर निर्णय घेऊ. येडियुराप्पा यांनी पूर्वी सांगितले होते की कोविड-प्रेरित लॉकडाऊनसाठी दुसरे आर्थिक पॅकेज विचारात घेतले जात आहे आणि पहिल्या वर्गातील काही विभागांना दिलासा देण्याचे उद्दीष्ट आहे.
या साथीच्या आजाराच्या दुसर्‍या लाटेशी राज्य झुंज देत असताना, नुकत्याच लॉकबंदीमुळे ज्यांच्या जीवनावर परिणाम झाला आहे त्यांच्यासाठी दिलासा म्हणून त्यांनी नुकतीच 1,250 कोटी रुपयांच्या आर्थिक पॅकेजची घोषणा केली होती.