‘पुढच्या वर्षी लवकर या’च्या जयघोषात घरगुती गणेश विसर्जन

तलाव, विहिरीवर भाविकांची गर्दी; पर्यावरणपूरक उपक्रमांना उत्स्फूर्त प्रतिसाद

निपाणी (प्रतिनिधी) : “गणपती बाप्पा मोरया… पुढच्या वर्षी लवकर या ऽऽ” अशा जयघोषात मंगळवारी (ता.२) निपाणी शहर व परिसरातील घरगुती गणेश मूर्तींचे विसर्जन उत्साहात पार पडले. सहा दिवसांच्या पूजाअर्चेनंतर भाविकांनी श्रीगणरायाला निरोप दिला.
यंदा निपाणी नगरपालिका प्रशासनासह दौलतनगर येथील दौलतराव पाटील सोशल फाउंडेशनतर्फे नवव्या वर्षी पर्यावरणपूरक विसर्जनाची विशेष सोय करण्यात आली होती. या उपक्रमाला नागरिकांचा मोठा प्रतिसाद मिळाला. पूजा, आरती, महाप्रसाद यांमधून गेलेल्या सहा दिवसांत भक्तांनी सुख-शांती नांदो, महागाईचे संकट दूर होवो, अशा प्रार्थना गणेशास व गौरीस अर्पण केल्या.
शहरातील रामनगर खणी, साखरवाडी हवेली तलाव, आंबेडकरनगरजवळील खण, राष्ट्रीय महामार्ग परिसरातील खणी यांसह विविध ठिकाणी विसर्जनाची व्यवस्था करण्यात आली होती. ग्रामीण भागातही गणेश, गौरी व शंकरोबाचे विसर्जन पारंपरिक जल्लोषात झाले. दुपारी चारनंतर घरगुती तसेच शासकीय कार्यालयातील मूर्ती वाद्यांच्या गजरात विसर्जनासाठी निघाल्या. मात्र, सायंकाळी झालेल्या पावसामुळे काही काळ विसर्जनाला खंड पडला. पावसानंतर भाविकांनी पुन्हा गर्दी केली. रात्री उशिरापर्यंत तलाव, विहिरी व खणांवर भाविकांचा उत्साह कायम होता. पोलिस व अग्निशामक दलाच्या जवानांनी बंदोबस्त ठेवला होता.
——————————————————————-
पारंपरिक वाद्यांचा गजर
विसर्जन मिरवणुकीत शहर व ग्रामीण भागातील मंडळांनी ढोल-ताशे, सनई-चौघडा, करडी ढोल, धनगरी ढोल, झांजपथक, बँडपथक तसेच भजन-दिंडीच्या गजरात सहभाग नोंदवला.
——————————————————————-
पाण्याच्या पिंपात मूर्ती विसर्जन
पाण्याचे प्रदूषण टाळण्यासाठी अनेकांनी घरगुती पातळीवर पाण्याच्या पिंपामध्येच गणेश मूर्ती विसर्जन करून पर्यावरणपूरक आदर्श घालून दिला. या उपक्रमांची गरज असल्याचे भाविकांनी नमूद केले.
——————————————————————-
निर्माल्य संकलन उपक्रम
दौलतमळा येथील दौलतनगर सोशल फाउंडेशन व हेल्थ क्लबतर्फे यंदा प्रथमच निर्माल्य संकलनाचे आयोजन करण्यात आले. त्याला गणेश भक्तांनी उत्स्फूर्त प्रतिसाद दिला. या उपक्रमामुळे विसर्जनस्थळी स्वच्छता राखली गेली असून, हा उपक्रम यशस्वी झाल्याचे दौलतराव सोशल फाउंडेशनचे संस्थापक आणि टाऊन प्लॅनिंग अध्यक्ष निकु पाटील यांनी सांगितले.