बेळगाव : बेळगावातील आरटीओ सर्कलजवळ झाड पडल्याने युवकाचा मृत्यू झाल्याच्या घटनेपाठोपाठ आणखी एक झाड कोसळल्याची घटना आज घडली. विशेष म्हणजे वन खात्याच्या कार्यालयासमोरच ही घटना घडली असून त्यात अनेक वाहनांचे नुकसान झाले आहे.
बेळगाव येथील मार्केट पोलीस स्टेशन आणि वनविभागाच्या कार्यालयाजवळ मोठे झाड कोसळून इनोव्हा वाहनासह इतर वाहनांची नासधूस झाली. दोन रिक्षा आणि एक इनोव्हा झाडाखाली अडकल्या. सुदैवानेच या घटनेत कोणतीही जीवितहानी झाली नाही. वनविभाग आणि पोलीस अधिकार्यांनी घटनास्थळी पोहोचून पाहणी केली. झाडाचा बुंधा व फांद्या कापून झाड हटविण्यात आले.