मराठा मंदिरात जिजाऊ जयंती उत्साहाने साजरी

बेळगाव : येथील मराठा मंदिरामध्ये दरवर्षी प्रमाणे यंदाही रविवारी जिजाऊ जयंती आणि स्वामी विवेकानंद जयंती साजरी करण्यात आली. यानिमित्त पुण्याच्या सायली जोशी- गोडबोले यांनी जिजाऊंच्या जीवनावरील एकपात्री नाटक सादर केले.
जिजाऊंच्या जन्मापासून त्यांचे बालपण, त्यांचा विवाह, त्यानंतर शिवरायांचा जन्म, त्यांचे बालपण, त्यांच्यावर केलेले संस्कार, त्या काळात आया बहिणीवर होणाऱ्या अत्याचाराच्या विरोधात शिवरायांची तयार केलेली मानसिकता, त्यानंतर शिवरायांचे लग्न, संभाजी महाराजांची हत्या, शिवरायांची मुले, त्यांनी केलेला अफजलखानाचा वध अशा अनेक घटनांचे वर्णन सायली जोशी यांनी अतिशय नीटनेटकेपणे केले आणि उपस्थित रसिकांना शिवकालात नेऊन सोडले.
शेकडो स्त्री-पुरुषांच्या उपस्थितीत संपन्न झालेल्या या कार्यक्रमाने शिवरायांच्या जीवनाचा जागर केला आणि रसिकांना मंत्रमुग्ध केले.
या तीन तासाच्या कार्यक्रमाची सुरुवात मराठा मंदिर चे अध्यक्ष आप्पासाहेब गुरव यांनी दीप प्रज्वलन करून केली. मराठा मंदिरच्या संचालकांच्या हस्ते राष्ट्रमाता जिजाऊ, स्वामी विवेकानंद यांच्या प्रतिमेस व छत्रपती शिवाजी महाराजांच्या पुतळ्यास पुष्पहार अर्पण करण्यात आले.
आप्पासाहेब गुरव यांनी प्रास्ताविक करून सर्वांचे स्वागत केले. राष्ट्रमाता जिजाऊ यांचे चरित्र समाज माणसावर बिंबवावे या उद्देशाने हा उपक्रम आयोजित करण्यात आला असून याही पुढे असे उपक्रम आम्ही साजरे करणार आहोत असे त्यांनी सांगितले. चंद्रकांत गुंडकल यांनी सायली जोशी यांचा परिचय करून दिला. गुरव यांच्या हस्ते जोशी यांना सन्मानित करण्यात आले. नेताजी जाधव यांनी आभार प्रदर्शन केले. कार्यक्रमास स्त्री-पुरुष मोठ्या संख्येने उपस्थित होते.