Belgaum Varta Belgaum Varta
बेळगाव : दूध ते दारूपर्यंत दरवाढ करणे हेच काँग्रेस सरकारचे एकमेव यश आहे. भाजप याविरोधात गाव पातळीपासून दिल्लीपर्यंत सातत्याने आंदोलन करत असून, येत्या काळात जनता काँग्रेस सरकारला योग्य धडा शिकवेल, असे अरभावीचे आमदार भालचंद्र जारकीहोळी म्हणाले.
आज बेळगाव येथे भाजपने पत्रकार परिषद आयोजित केली होती. यावेळी काँग्रेस सरकारच्या अपयशाचे आरोपपत्र असणारे पुस्तक प्रकाशित करण्यात आले. अरभावीचे आमदार भालचंद्र जारकीहोळी म्हणाले की, भाजप सरकारच्या काळात उन्हाळ्यात पिण्याच्या पाण्याची समस्या दूर करण्यासाठी प्रत्येक मतदारसंघाला किमान ५० लाख रुपये दिले जात होते. मात्र, यावेळी ५ लाख रुपयेही न देणारे हे बेजबाबदार सरकार आहे. गरीब समर्थक सरकार म्हणणारे मुख्यमंत्री सिद्धरामय्या यांनी दूध आणि दारू दरातही दरवाढ केली आहे. काँग्रेस सरकार हमीभावाने एका बाजूने पैसे देत आहे आणि दुसऱ्या बाजूने दरवाढ करून ते परत घेत आहे. भाजप याविरोधात गाव ते दिल्लीपर्यंत आंदोलन करेल. येत्या काळात जनता काँग्रेस सरकारला योग्य उत्तर देईल, असे ते म्हणाले.
दक्षिणचे आमदार अभय पाटील म्हणाले की, शेतकरी समर्थक सरकार असूनही शेतकऱ्यांच्या पंपसेटला १,१०० पट दरवाढ, पाण्याच्या दरात ५५ टक्के वाढ, मेट्रो रेल्वेच्या दरात ४०० टक्के वाढ, स्टॅम्प ड्युटीमध्ये १०५ टक्के वाढ केली आहे. जीवनकालासाठी इतकी दरवाढ करणाऱ्या सरकारने मृत्यू प्रमाणपत्राचे दर वाढवून जनतेवर ओझे लादले हेच सरकारचे यश आहे. विकास न करता, जीवनावश्यक वस्तू आणि आवश्यक वस्तूंच्या किमती वाढवणे हेच सरकारचे यश आहे, असे ते म्हणाले.
माजी आमदार संजय पाटील म्हणाले की, काँग्रेसवाले निर्लज्जपणे ‘साधना संमेलन’ घेत आहेत. सरकारच्या अपयशाचा निषेध करत भाजपने विधानसभेच्या आत आणि बाहेर संघर्ष केला आहे आणि सरकारला प्रश्न विचारले आहेत. काँग्रेस एक हट्टी सरकार आहे. कितीही टीका केली किंवा प्रश्न विचारले तरी ते आपला हट्टीपणा दाखवत आहेत. पीएच.डी. करण्याइतकी वाईट कामे राज्य काँग्रेस सरकार करत आहे, असे ते म्हणाले.या पत्रकार परिषदेला भाजपचे आजी माजी लोकप्रतिनिधी, भाजप महानगर अध्यक्षा गीता सुतार, ग्रामीण अध्यक्ष सुभाष पाटील यांच्यासह इतर मान्यवर उपस्थित होते.
