बेळगाव महानगरपालिकेकडून पत्रकारांना आरोग्य विमा कार्डचे वाटप

बेळगाव : बेळगाव महापालिकेकडून पत्रकारांच्या आरोग्याची काळजी घेण्यासाठी आरोग्य विमा योजना सुरू करण्यात आली आहे, अशी माहिती महापौर मंगेश पवार यांनी दिली.
शनिवारी बेळगावच्या महापौर कार्यालयात पत्रकारांना आरोग्य विमा कार्डचे वाटप करताना ते बोलत होते. यावेळी बोलताना महापौरांनी, सध्याच्या काळात प्लॅस्टिकचा वापर कमी करण्यावर भर दिला पाहिजे, असे आवाहन केले. तसेच, सुंदर बेळगाव घडवण्यासाठी पत्रकारांनी सहकार्य करावे, अशी अपेक्षा त्यांनी व्यक्त केली.

उपमहापौर वाणी जोशी यांनी सांगितले की, पत्रकारांच्या कुटुंबाच्या हितासाठी असलेल्या आरोग्य विम्याची रक्कम ३ लाख रुपयांवरून ५ लाख रुपयांपर्यंत वाढवण्यात आली आहे. सर्वांनी आपल्या आरोग्याकडे लक्ष द्यावे, असे आवाहनही त्यांनी केले. महापालिका आयुक्त शुभ बी. यांनी सांगितले की, अनेक वर्षांपासून पत्रकारांच्या आरोग्याच्या संरक्षणासाठी आरोग्य कार्डचे वाटप केले जात आहे. पूर्वी ३ लाख रुपयांचा आरोग्य विमा होता, तो पत्रकारांच्या मागणीनुसार ५ लाख रुपये करण्यात आला आहे. यासाठी सर्व सदस्यांनी सहकार्य केल्याबद्दल त्यांनी आभार मानले. मानवी जीवनात आरोग्याच्या समस्या उद्भवणे स्वाभाविक आहे; अशा वेळी या आरोग्य विम्याचा लाभ घेण्याचे आवाहन त्यांनी केले.

महापालिका सत्ताधारी पक्षाचे नेते हनुमंत कोंगाळी यांनी सांगितले की, बेळगाव महापालिकेकडून प्रथमच पत्रकारांसाठी आरोग्य विमा लागू करण्यात आला आहे. प्रत्येक पत्रकार कुटुंबाला ५ लाख रुपयांचा आरोग्य विमा देण्यात आला आहे. महापौर आणि उपमहापौर यांच्या मार्गदर्शनाखाली ही आरोग्य विमा योजना लागू करण्यात आली असून, सर्व पत्रकारांनी याचा लाभ घ्यावा, असे आवाहन त्यांनी केले.

बेळगाव पत्रकार संघाचे अध्यक्ष विलास जोशी यांनी सांगितले की, पूर्वी महापालिकेकडून पत्रकारांना ३ लाख रुपयांचा आरोग्य विमा मिळत होता. तो ५ लाख रुपये करण्याची विनंती केल्यानंतर महापौर, उपमहापौर आणि स्थानिक आमदारांनी सहकार्य करून ही विमा रक्कम वाढवली. त्याबद्दल त्यांनी सर्व पत्रकारांच्या वतीने आभार मानले. इलेक्ट्रॉनिक मीडिया असोसिएशनचे अध्यक्ष मंजुनाथ पाटील यांनी सांगितले की, बेळगावच्या पत्रकारांना महापालिकेकडून आरोग्य विमा कार्डचे वाटप करण्यात आल्याचा आनंद आहे. मात्र, काही पत्रकारांची नावे यादीतून वगळली गेली आहेत, ती समाविष्ट करण्याची विनंती त्यांनी केली. यावेळी पत्रकार राजू गवळी, श्रीशैल मठद, रवी उप्पार, मल्लिकार्जुन मुगळी, संजय सुर्यवंशी, सहदेव माने, मुन्ना भागवान यांच्यासह इतर पत्रकार उपस्थित होते.