सी. टी. रवी यांना सशर्त जामीन मंजूर

बंगळूर : महिला व बालकल्याण मंत्री लक्ष्मी हेब्बाळकर यांच्या विरोधात अश्लील भाषा वापरल्याच्या आरोपावरून पोलिसांनी अटक केलेले भाजपचे विधान परिषद सदस्य सी.टी. रवी यांना उच्च न्यायालयाने मोठा दिलासा दिला आहे. उच्च न्यायालयाने त्यांची तात्काळ सुटका करण्याचे अंतरिम आदेश दिले आहेत. यामुळे रवी यांच्या समर्थकांनी आनंद साजरा केला.
बेळगावातील सुवर्णसौध येथे विधान परिषदेत घडलेली घटना राज्यातील नागरिकांसाठी अत्यंत दुर्दैवी असल्याचे न्यायालयाने मानले आणि आवश्यक असेल तेव्हा तपासात सहकार्य करावे, या अटीवर भाजपचे विधान परिषद सदस्य सी. टी. रवी यांची तात्काळ सुटका करण्याचे निर्देश पोलिसांना दिले.
कायदेशीर कारवाई न करता पोलिसांच्या अटकेला आव्हान देणारा जामीन अर्ज दाखल करणाऱ्या सी. टी. रवी यांनी सांगितले की, ते सुटण्यास पात्र आहेत. या अर्जावर न्यायमूर्ती एम.जी. उमा यांच्या खंडपीठाने अंतरिम आदेश दिला.
लक्ष्मी हेब्बाळकर यांनी गुरुवारी बेळगाव येथील सुवर्णसौधा येथे झालेल्या विधान परिषदेच्या अधिवेशनात रवी यांनी अपमानास्पद शब्द वापरल्याचा आरोप करत तक्रार दाखल केली. हिरेबागेवाडी पोलीस ठाण्यात बीएनएस कायदा ७५ आणि ७९ अंतर्गत सी. टी. रवीविरुद्ध एफआयआर दाखल करण्यात आला.
लैंगिक छळ, स्त्रीच्या इच्छेविरुद्ध अश्लीलता दाखवणे. एखाद्या महिलेच्या नम्रतेचा अपमान करण्याच्या उद्देशाने हावभाव, शब्द किंवा कृती करणे एफआयआरमध्ये लैंगिक टिप्पणी म्हणून नमूद करण्यात आले होते. एफआयआर दाखल झाल्यानंतर रवी यांना अटक करण्यात आली.
बेळगाव न्यायालयाने रवी यांच्या जामीन अर्जाबाबतचे प्रकरण बंगळुर लोकप्रतिनिधी न्यायालयाकडे वर्ग केल्यानंतर पोलीस त्याना बंगळुरला आणत होते.
दरम्यान, न्यायालयाने सुनावणी उद्यापर्यंत तहकूब केली. दरम्यान, सिटी रवीच्या जामीन अर्जावर न्यायमूर्ती एम. जी. उमा यांचा समावेश असलेल्या खंडपीठाने तपासात सहकार्य करण्याच्या अटीवर त्यांना जामीन मंजूर केला.