हुबळीत पाच वर्षाच्या बालिकेवर अत्याचार करून हत्या

स्थानिकांची आरोपींना एन्काउंटर करण्याची मागणी

बंगळूर : राज्यात मुलींवरील क्रूर कृत्ये थांबण्याचे नाव घेत नाहीत. हुबळीमध्ये अशीच एक भयानक घटना घडली आहे, ज्यामुळे नागरी समाजाला लाज वाटावी. हुबळी येथील अध्यापक नगरमध्ये एका पाच वर्षांच्या मुलीचा मृतदेह शौचालयात आढळून आल्याची धक्कादायक घटना घडली आहे. स्थानिक आणि पालकांनी मुलीवर अत्याचार करून तिची हत्या केल्याचा आरोप केला आहे.
हुबळी पोलिसांनी गुन्हा दाखल केला असून आरोपींचा शोध घेण्यासाठी अनेक पथके तयार केली आहेत.

आज मुलीचे वडील कामावर गेले असताना ही घटना घडल्याची माहिती मिळाली. मुलीची आई घरात काम करत होती आणि मुलगी बाहेर खेळत होती. सीसीटीव्ही फुटेजनुसार, आरोपी मुलीला फूस लावून पळवून नेताना दिसत आहे.
जेव्हा आईला कळले, की तिची मुलगी बेपत्ता आहे, तेव्हा तिने स्थानिक लोकांसोबत तिचा शोध सुरू केला. मुलीचे पालक कोप्पळचे आहेत आणि ते रंगकामासाठी हुबळी येथे आले होते. स्थानिकांच्या म्हणण्यानुसार, मुलीचा मृतदेह बांधकाम सुरू असलेल्या इमारतीच्या वापरात नसलेल्या शौचालयात आढळला.
मृतदेह सापडल्यानंतर लगेचच स्थानिकांनी, विशेषतः महिलांनी अशोक नगर पोलिस ठाण्यासमोर मोठा निषेध केला. शहर पोलीस आयुक्त एन. शशी कुमार यांच्यासह वरिष्ठ पोलीस अधिकाऱ्यांनी स्टेशनला भेट दिली आणि निदर्शकांना शांत करण्याचा प्रयत्न केला.
पोलिस सूत्रांनी सांगितले की, स्थानिकांनी सीसीटीव्ही फुटेजच्या आधारे आरोपीची ओळख पटवली. तथापि, पोलिस अजूनही पुरावे शोधत आहेत.
पोलिसांनी सांगितले की, अत्याचार आणि हत्येचे दोन गुन्हे दाखल करण्यात आले आहेत. तथापि, वैद्यकीय तपासणीनंतरच अत्याचाराची पुष्टी होऊ शकते. मुलीचा मृतदेह हुबळी येथील किम्स रुग्णालयात हलवण्यात आला आहे.