काँग्रेस आमदार वीरेंद्र पप्पी यांना २८ ऑगस्टपर्यंत ईडी कोठडी

बंगळूर : बेकायदेशीर बेटिंग कंपनी चालवण्याच्या आरोपांशी संबंधित मनी लाँड्रिंग प्रकरणात अटक केलेले काँग्रेस आमदार के. सी. वीरेंद्र पप्पी यांना येथील न्यायालयाने रविवारी २८ ऑगस्टपर्यंत अंमलबजावणी संचालनालयाच्या (ईडी) कोठडीत पाठवले.
सूत्रांनी दिलेल्या माहितीनुसार, आमदाराला आज सकाळी सिक्कीमहून बंगळुरला आणण्यात आले.
येथील विमानतळावर पोहोचताच ईडीच्या विशेष पथकाने त्यांना ताब्यात घेतले. कोणताही अनुचित प्रकार घडू नये म्हणून केम्पेगौडा आंतरराष्ट्रीय विमानतळाच्या टर्मिनल २ वर कडक सुरक्षा व्यवस्था ठेवण्यात आली होती.
पप्पी, त्याचा भाऊ आणि इतरांविरुद्ध बेकायदेशीर बेटिंग कंपनी चालवल्याच्या आरोपाखाली मनी लाँड्रिंग प्रकरणाचा भाग म्हणून केंद्रीय तपास यंत्रणेने शुक्रवारी चित्रदुर्ग, बेंगळुर आणि कर्नाटकातील हुबळी, जोधपूर (राजस्थान), मुंबई आणि गोवा येथील किमान ३० ठिकाणी छापे टाकले.
त्यांनी सांगितले की, गोव्यात पपीज कॅसिनो गोल्ड, ओशन रिव्हर्स कॅसिनो, पपीज कॅसिनो प्राइड, ओशन ७ कॅसिनो आणि बिग डॅडी कॅसिनो या पाच कॅसिनोवरही छापे टाकण्यात आले.
‘बेकायदेशीर’ ऑनलाइन आणि ऑफलाइन बेटिंगशी संबंधित एका प्रकरणात ही तपासणी करण्यात आल्याचे ईडीच्या सूत्रांनी सांगितले.
वीरेंद्र हा किंग ५६७, राजा ५६७, पप्पीज ००३, रत्ना गेमिंग इत्यादी ऑनलाइन बेटिंग साइट्स चालवतो आणि त्याचा भाऊ के. सी. तिप्पेस्वामी दुबईतील तीन कंपन्या चालवतो – डायमंड सॉफ्टेक, टीआरएस टेक्नॉलॉजीज आणि प्राईम ९ टेक्नॉलॉजी या कंपन्या वीरेंद्रच्या कॉल सेंटर सेवा आणि गेमिंग व्यवसायाशी संबंधित असल्याचा आरोप आहे.
सूत्रांनी दिलेल्या माहितीनुसार, काँग्रेस नेत्या कुसुमा एच यांचे भाऊ अनिल गौडा यांच्या बंगळुर येथील निवासस्थानीही झडती घेण्यात आली आहे.