दिल्लीतील दाट धूर-धुक्याचा फटका; कर्नाटकातील २१ आमदार अडकले चार तास विमानात

बंगळूर : दिल्लीतील दाट धूर व धुक्यामुळे कर्नाटकातील २१ आमदारांना घेऊन जाणारे इंडिगोचे विमान तब्बल चार तासांहून अधिक काळ उशिराने उड्डाण करू शकले. त्यामुळे आज पहाटे आमदारांना विमानातच अडकून राहावे लागले.
शहरात आयोजित ‘मत चोरी’ विषयावरील परिषदेसाठी मंत्री व काँग्रेस आमदार दिल्लीला आले होते. त्यानंतर दावणगेरे येथे होणाऱ्या ज्येष्ठ काँग्रेस नेते शमनूर शिवशंकरप्पा यांच्या अंत्यसंस्काराला उपस्थित राहण्यासाठी दिल्लीहून बेळगावला जाणाऱ्या इंडिगोच्या विमानाने ते प्रवास करणार होते.
हे विमान सकाळी ५.३० वाजता दिल्ली विमानतळावरून उड्डाण करणे अपेक्षित होते. मात्र, आमदार पहाटे सुमारे ४ वाजल्यापासून विमानात बसूनही दाट धूर आणि धुक्यामुळे विमानाने उड्डाण घेतले नाही. दिल्लीतील प्रतिकूल हवामानामुळे टेक-ऑफ आणि लँडिंग प्रक्रियेत अडथळे निर्माण झाले होते. सकाळी १० वाजेपर्यंतही विमान धावपट्टीवरच थांबून होते, त्यामुळे प्रवाशांची गैरसोय झाली.
विमानात मंत्री लक्ष्मी हेब्बाळकर, के.जे. जॉर्ज, कोनारेड्डी, बसनगौडा बादर्ली, आनंद गड्डेवरमत, एच.के. पाटील, शरण प्रकाश पाटील, राजू गौडा, सलीम अहमद, तसवीर सायर, सतीश जारकीहोळी, जी.एस. पाटील, मलिकय्या गुत्तेदार, ईश्वर खांड्रे, जे.टी. पाटील, तिप्पण्णा कमकनूर, नागेंद्र, एम.बी. पाटील, आलम प्रभू आणि रेहमान खान यांच्यासह एकूण २१ आमदार होते.
अखेर हवामानात काहीशी सुधारणा झाल्यानंतर सकाळी ११ वाजता विमानाने उड्डाण घेतले आणि ते बेळगावच्या दिशेने रवाना झाले. चार तासांहून अधिक झालेल्या विलंबामुळे आमदारांच्या नियोजित कार्यक्रमांवर परिणाम झाला असला, तरी सुरक्षिततेच्या दृष्टीने उड्डाणास विलंब करण्यात आल्याचे विमानतळ प्रशासनाकडून सांगण्यात आले.