काँग्रेस आमदार सतीश सैल यांना उच्च न्यायालयाकडून अंतरिम जामीन

वैद्यकीय कारणावर दिलासा

बंगळूर : बेलकेरी बंदरातून बेकायदेशीररीत्या लोखंडाच्या धातूची निर्यात केल्याप्रकरणी अंमलबजावणी संचालनालयाने (ईडी) दाखल केलेल्या मनी लॉन्डरिंग प्रकरणात अटक करण्यात आलेले काँग्रेस आमदार सतीश सैल यांना कर्नाटक उच्च न्यायालयाने गुरुवारी वैद्यकीय कारणावरून अंतरिम जामीन मंजूर केला.
सतीश सैल यांनी वैद्यकीय कारणे दाखवून सादर केलेल्या जामीन अर्जावर सुनावणी घेताना, त्यांना लवकरच लिव्हर प्रत्यारोपण (लिव्हर ट्रान्सप्लांट) करणे आवश्यक असल्याचे लक्षात घेऊन न्यायालयाने जामीन मंजूर केला. लिव्हर प्रत्यारोपणाबाबत दर दोन आठवड्यांनी अहवाल सादर करावा तसेच दर आठ आठवड्यांनी आरोग्यस्थितीचा वैद्यकीय अहवाल न्यायालयात दाखल करावा, असे निर्देश न्यायालयाने दिले आहेत.
याशिवाय, आरोपीने सरकारी पक्षाच्या साक्षीदारांवर कोणताही दबाव टाकू नये, तसेच खटल्याच्या सुनावणीत अडथळा निर्माण करू नये, अशी स्पष्ट अट घालण्यात आली आहे. सतीश सैल यांनी पाच लाख रुपयांचा वैयक्तिक जामीननामा आणि एक जामीनदार सादर करणे बंधनकारक असल्याचेही न्यायालयाने नमूद केले.
उत्तर कन्नड जिल्ह्यातील बेलकेरी बंदरात जप्त करून साठवून ठेवलेल्या हजारो टन लोखंडाच्या धातूची चोरी करून त्याची बेकायदेशीर वाहतूक केल्याप्रकरणी, लोकप्रतिनिधींसाठीच्या विशेष न्यायालयाने यापूर्वी सतीश सैल यांना सात वर्षांची कारावासाची शिक्षा सुनावली होती.
या प्रकरणाशी संबंधित ईसीआयआर दाखल करून ईडीने स्वतंत्र तपास सुरू केला होता. तपासादरम्यान, मागील वर्षी १३ आणि १४ ऑगस्ट रोजी ईडीने कारवार आणि बंगळुर येथील सतीश सैल यांच्या निवासस्थानी छापे टाकले होते. या कारवाईत सुमारे १३ कोटी रुपयांची रोकड आणि मोठ्या प्रमाणात सोन्याचे दागिने जप्त करण्यात आले होते.
प्रकरणाच्या सुनावणीसाठी गेल्या वर्षी १० सप्टेंबर रोजी न्यायालयात हजर राहिल्यानंतर, ईडीने सतीश सैल यांना अटक केली होती. आता वैद्यकीय कारणावरून त्यांना मर्यादित कालावधीसाठी अंतरिम जामीन मंजूर करण्यात आला आहे.