योग हा जीवनाचा मार्ग : पंतप्रधान मोदी

आठव्या आंतरराष्ट्रीय योग दिनाचे उद्घाटन

बंगळूर : योग हा जीवनाचा भाग नसून, ती एक जीवन पद्धती आहे, तो एक जीवनाचा मार्ग आहे, असे मत पंतप्रधान नरेंद्र मोदी यांनी मंगळवारी म्हैसूर येथे व्यक्त केले. ऐतिहासिक भव्य म्हैसूर महाराजा राजवाड्याच्या आवारात आठव्या आंतरराष्ट्रीय योग दिनाच्या उद्घाटन समारंभात ते बोलत होते.
पंतप्रधान पुढे म्हणाले, की योगामुळे सार्वत्रिक आरोग्याची खात्री होत आहे. घरोघरी आणि अध्यात्मिक केंद्रांमध्ये साधला जाणारा योग आता जगभर पाहायला मिळत आहे. तो नैसर्गिक मानवी आत्मा बनला आहे.
कोविड १९ महामारीच्या दोन वर्षात योगाची भावना कमी झालेली नाही. असे पंतप्रधान म्हणाले. योग व्यक्तीसाठी नाही, योग मानवतेसाठी आहे.
ते म्हणाले, मी याप्रसंगी भारताच्या वतीने संयुक्त राष्ट्राचे आणि सर्व देशांचे आणि जगातील सर्व नागरिकांचे आभार मानतो. योगामुळे पृथ्वी आणि विश्वात शांती नांदते. योग लाखो लोकांना जोडू शकतो. भारतातील ७५ ऐतिहासिक ठिकाणी योग केले जात आहे असेही ते म्हणाले.
योग को जाना भी है, जीना भी है. पाना भी है, और अपनाना भी है. (एखाद्याने योग जाणून घेतला पाहिजे, योग जगला पाहिजे आणि जीवनात योगाचा अंगीकार केला पाहिजे) असे ते पुढे म्हणाले.
आंतरराष्ट्रीय योग दिनाच्या समारंभात 45 मिनिटांच्या कालावधीत तब्बल १९ आसन किंवा आसनांचे प्रदर्शन समाविष्ट आहे. एका मिनिटाच्या प्रार्थनेने उत्सवाची सुरुवात झाली. पंतप्रधानांनी १९ आसने केली, ज्यात ताडासन, वृक्षासन, पदहस्तासन, अर्धचक्रासन चक्रासन, मकरासन, सेतूबंधासन. शलभासन आणि इतर आसने समाविष्ट आहेत.
‘सिटी ऑफ पॅलेसेस’, तसेच ‘योग हब’ ने आंतरराष्ट्रीय योग दिन यशस्वीरित्या आयोजित करून आणखी एक इतिहास रचला आहे, ज्यात पंतप्रधान नरेंद्र मोदी यांनी मंगळवारी सामूहिक योग प्रात्यक्षिकात भाग घेतला.
म्हैसूर हे दक्षिण भारतातील अंतरराष्ट्रीय योग दिनाचे आयोजन करणारे पहिले शहर आहे. मानवतेसाठी योग या थीमवर आयोजित योग दिनामध्ये शाळकरी मुले, सामान्य लोक, पोलिस आणि इतरांसह सुमारे १५ हजार लोकांनी सहभाग घेतला. सकाळी ७.०५ ते ८.१० या वेळेत ६५ मिनिटांसाठी सामूहिक योग सराव पार पडला.
सामूहिक प्रात्यक्षिकाच्या आधी, पंतप्रधानांनी उपस्थितांना संबोधित केले आणि योगाचे महत्त्व अधोरेखित केले. म्हैसूर येथे पंतप्रधानांचा योग कार्यक्रम ‘गार्डियन योग रिंग’ या अभिनव कार्यक्रमाचा एक भाग आहे जो ७९ देश आणि संयुक्त राष्ट्र संघटना आणि परदेशातील भारतीय मिशन्समध्‍ये एक सहयोगी सराव आहे आणि योगाची राष्ट्रीय सीमा ओलांडून एकात्म सामर्थ्य दाखविण्‍यासाठी आहे.
लोकप्रतिनिधीं व्यतिरिक्त, आमदार, खासदार आणि मंत्री, म्हैसूरच्या पूर्वीच्या राजघराण्यातील सदस्य प्रमोदा देवी वाडियार आणि यदुवीर कृष्णदत्त चामराज वाडियार यांनी पंतप्रधानांसोबत व्यासपीठ सामायिक केले.
कर्नाटकचे राज्यपाल थावरचंद गेहलोत, मुख्यमंत्री बसवराज बोम्मई, केंद्रीय आयुष, बंदरे, जहाजबांधणी आणि जलमार्ग मंत्री सर्बानंद सोनोवाल आणि आयुष मंत्रालयाचे अधिकारी आणि इतर मान्यवर मुख्य योग कार्यक्रमात सहभगी झाले होते.