४० लाख लाचेच्या आरोपावरून भाजपच्या आमदार पुत्रास अटक

आठ कोटी जप्त; सोप अँड डिटर्जंट्सच्या अध्यक्षपदाचा आमदार विरुपाक्षप्पांचा राजीनामा

बंगळूर : ४० लाख रुपयांची लाच घेतल्याच्या आरोपावरून अटक करण्यात आलेल्या भाजप आमदार के. मदल विरुपक्षप्पा यांचा मुलगा प्रशांत याच्या घरातून लोकायुक्तांनी सहा कोटी व कार्यालयातून दोन कोटीहून अधिक रुपयांची बेहिशेबी रोकड जप्त केली.
आपल्या मुलावरील लोकायुक्तांच्या कारवाईनंतर, भाजप आमदाराने कर्नाटक सोप अँड डिटर्जंट्स लिमिटेड (केएसडीएल)च्या चेअरमनपदाचा राजीनामा दिला. त्यांनी असा दावा केला की लाचलुचपत प्रतिबंधक एजन्सीने टाकलेले छापे हे त्यांच्या आणि त्यांच्या कुटुंबाविरुद्ध कट आहे.
बंगळुरू पाणीपुरवठा आणि मलनिस्सारण ​​मंडळाचा मुख्य लेखापाल प्रशांत याला गुरुवारी संध्याकाळी कर्नाटक सोप अँड डिटर्जंट्स लिमिटेड (केएसडीएल) कार्यालयात कंत्राटदाराकडून लाच घेताना रंगेहात पकडण्यात आले.
सापळा लावल्यानंतर काही तासांतच लोकायुक्त अधिकाऱ्यांच्या पथकाने त्याच्या घरावर छापा टाकून बेहिशेबी रोकड जप्त केली. लोकायुक्त सूत्रांनी दिलेल्या माहितीनुसार, दावणगेरे जिल्ह्यातील चन्नागिरी मतदारसंघाचे आमदार विरुपक्षप्पा हे केएसडीएलचे अध्यक्ष आहेत आणि प्रशांत त्याच्या वडिलांच्या वतीने लाचेचा “पहिला हप्ता” घेत असल्याचा आरोप आहे.
विरुपक्षप्पा यांनी शुक्रवारी आपल्या पदाचा राजीनामा दिला. मुख्यमंत्र्यांना पाठवलेल्या आपल्या राजीनामा पत्रात त्यांनी म्हटले आहे की त्यांचा आणि लोकायुक्तांच्या छाप्याचा कोणताही संबंध नाही. आपल्या कुटुंबाविरुद्ध कट रचल्याचा त्यांनी आरोप केला.
“माझ्यावर आरोप झाले असले तरी, मी नैतिक जबाबदारी घेत आहे आणि केएसडीएल चेअरमन पदाचा राजीनामा देत आहे, असे ते म्हणाले.
कर्नाटकचे लोकायुक्त न्यायमूर्ती (निवृत्त) बी. एस. पाटील यांनी शुक्रवारी सांगितले की, केएसडीएल कार्यालयातून २.०२ कोटी रुपये आणि प्रशांतच्या घरातून ६.१ कोटी रुपये वसूल करण्यात आले आहेत.
प्रशांतसह पाच जणांना ताब्यात घेण्यात आले आहे, त्यांच्याविरुध्द एफआयआर नोंदवण्यात आल्याचे ते म्हणाले.

आमदारांविरुध्द एफआयआर
लोकायुक्त अधिकाऱ्यांना लाच घेताना रंगेहाथ पकडल्याच्या प्रकरणी दावणगेरे जिल्ह्यातील चन्नागिरी मतदारसंघातील भाजप आमदार मदल विरुपक्षप्पा आणि त्यांचा मुलगा मदल प्रशांत यांच्यासह सहा जणांविरुद्ध एफआयआर दाखल करण्यात आला आहे.
मदल विरुपक्षप्पा यांना लाचखोरी प्रकरणात पहिले आरोपी बनवण्यात आले असून भाजप आमदारांना आता अटकेचा धोका निर्माण झाला आहे.
श्रेयस कश्यपने दाखल केलेल्या तक्रारीनुसार, लोकायुक्त पोलिसांनी एफआयआर नोंदवला, मदल विरुपक्षप्पा ए १ (प्रथम आरोपी), मदल विरुपक्षप्पाचा मुलगा मदल प्रशांत ए २ (दुसरा आरोपी), केएसडीएल अकाउंटंट सुरेंद्र ए ३, मदल प्रशांतचा नातेवाईक सिद्धेश ए ४, अरोमा कंपनीचे कर्मचारी अल्बर्ट निकोला ए ५, अरोमा कंपनीचे कर्मचारी गंगाधर ए ६ आरोपी आहेत.

आमदारांना अटकेची भिती
आमदार मदल विरुपक्षप्पा यांच्या विरोधात एफआयआर दाखल झाल्याने त्यांना अटक होण्याची भीती आहे आणि ते जामीन मिळविण्यासाठी प्रयत्न करत आहेत.
दुसरीकडे लोकायुक्त पोलिसांची तीन पथके आमदारांच्या शोधात आहेत. लोकायुक्त पोलिसांनी आमदारांचे चन्नेशपूर गावातील निवासस्थान, माविन्होलजवळील मादल कुटुंबाचे क्रशर कार्यालय आणि माविनकट्टे गावाजवळील फार्म हाऊसवर छापे टाकले. छाप्यामध्ये सोने आणि मोठ्या प्रमाणात मालमत्तेची कागदपत्रे सापडल्याचे सांगण्यात येत आहे.