कॉंग्रेस उमेदवारांची दुसरी यादी आज शक्य; बेळगावातून मृणाल, चिक्कोडीतून प्रियांका तर कारवारमधून अंजली निंबाळकर

१७ उमेदवार निश्चित, चार मतदारसंघात पेच

बंगळूर : लोकसभा निवडणुकीसाठी प्रलंबित असलेल्या मतदारसंघांसाठी उमेदवारांच्या निवडीबाबत काँग्रेस नेत्यांनी दिल्लीत बैठकांची मालिका सुरूच ठेवली आहे. १७ उमेदवारांची नावे निश्चित झाली असून राज्यातील चार मतदारसंघाचा पेच अजूनही कायम आहे. आज रात्री उशीरा किंवा उद्या (ता. २१) उमेदवारांची घोषणा करण्यात येणार असल्याचे प्रदेशाध्यक्ष व माजी मुख्यमंत्री डी. के. शिवकुमार यांनी दिल्ली येथे पत्रकारांना सांगितले.
सात मतदारसंघांसाठी उमेदवार आधीच जाहीर करण्यात आले आहेत, उर्वरित २१ मतदारसंघांपैकी १७ मतदारसंघांसाठी काल झालेल्या पहिल्या फेरीच्या बैठकीत उमेदवारांची निवड निश्चित करण्यात आली आहे. उर्वरित पाच मतदारसंघात संघर्ष असून, ते सोडविण्यासाठी प्रयत्न सुरू आहेत.
गुलबर्गा, चामराजनगर, कोलार, चिक्कबळ्ळापूर, बेळ्ळारी या मतदारसंघात मोठा गोंधळ सुरू आहे. त्यामुळे हायकमांडची मुख्यमंत्र्यांशी वारंवार चर्चा सुरू आहे. सायंकाळी होणाऱ्या केंद्रीय निवडणूक समितीच्या बैठकीत एकाचवेळी सर्व मतदारसंघातील उमेदवारांची निवड होण्याची शक्यता आहे.
म्हैसूर लोकसभा मतदारसंघासाठी लक्ष्मण, रायचूरसाठी कुमार नाईक, कोप्पळसाठी राजशेखर हिटनाळ, बिदरसाठी राजशेखर पाटील, दावणगेरेसाठी प्रभा मल्लिकार्जुन, चित्रदुर्गासाठी चंद्रप्पा, धारवाडसाठी विनोद असोटी, उडुपी-चिक्कमंगळूर मतदारसंघासाठी जयप्रकाश हेगडे, बेळगाव मतदार संघात मृणाल हेब्बाळकर, चिक्कोडीसाठी प्रियांका जारकीहोळी, उत्तर कन्नड (कारवार)साठी अंजली निंबाळकर, बंगळुर मध्य मन्सूरअलीखान, बंगळुर दक्षिणेला सौम्या रेड्डी यांची उमेदवारी निश्चित झाल्याचे समजते.
दक्षिण कन्नडसाठी पद्मराज यांचे नाव जवळपास निश्चित असले तरी काही नेते विनयकुमार सोरके यांच्या बाजूने लॉबिंग करत आहेत. बागलकोटमध्ये प्रबळ इच्छुक असलेल्या वीणा कशप्पनवर यांना डावलून मंत्री शिवानंद पाटील यांच्या कन्या संयुक्ता पाटील यांना उमेदवारी देण्याची चर्चा आहे.
वीणा कशप्पनवर यांनी तिकीट गमावल्यास पंचमसाली समाजाचे प्रदेशाध्यक्ष आणि आमदार असलेले विजयानंद कशप्पनवर नाराज होतील आणि साहजिकच त्यामुळे समाजाच्या असंतोषाला तोंड फुटण्याची भीती आहे.
गेल्या विधानसभा निवडणुकीत काँग्रेस पक्षाने लिंगायतांचे ट्रम्प कार्ड वापरून मते मिळवली. येडियुरप्पा, जगदीश शेट्टर आणि लक्ष्मण सवदी यांसारख्या प्रभावशाली समुदाय नेत्यांवर भाजपने अन्याय केल्याचा व्यापक प्रचाराचा फायदा काँग्रेसला झाला. यावेळी भाजप वक्कलिग समाजावर अन्याय करत असल्याचा प्रचार सुरू झाला आहे. त्याशिवाय वक्कलिगा समाजाच्या नेत्यांना अधिक तिकिटे देऊन काँग्रेस मते मिळवण्याचा प्रयत्न करत आहे.
काँग्रेस नेत्यांना बंगळुर उत्तर मतदारसंघातून आमदार प्रियकृष्ण यांना उभे करायचे आहे. मात्र ते हे मान्य करायला तयार नाहीत. आणखी एक प्रबळ इच्छुक राजीव गौडा, संधी दिल्यास ते जिंकू, असे ठामपणे सांगत आहेत. याशिवाय, उडुपी, चिक्कमंगळूर, म्हैसूरसह अनेक मतदारसंघात वक्कलिग समाजाला खुश करण्याचा निर्णय घेण्यात आला आहे.
आधीच घोषित केलेल्या मतदारसंघांमध्ये हसन आणि बंगळुर ग्रामीण जिल्ह्यांतील वक्कलिग समाजाला तिकीट देण्यात आले आहे. एम. चंद्रप्पा चित्रदुर्गातून निवडणूक लढवणार असल्याचं सांगण्यात येत आहे, मात्र अन्य कोणाच्या तरी नावाचीही चर्चा आहे. एआयसीसीचे अध्यक्ष मल्लिकार्जुन खर्गे यांनी गुलबर्ग्यातून निवडणुक लढवावी यासाठी त्यांचे मन वळविण्याचा प्रयत्न सुरू आहे. त्यांनी नकार दिल्यास त्यांचे जावई राधाकृष्ण हे गुलबर्ग्यातून उमेदवार असतील, असे सांगितले जात आहे.
मंत्री के. एच. मुनियप्पा यांचे जावई चिक्कपेद्दण्णा यांना कोलारचे तिकीट देण्यावर ठाम आहेत. दरम्यान, माजी राज्यसभा सदस्य एल. हनुमंतय्या यांच्या हस्तक्षेपामुळे उमेदवाराची निवड कठीण झाली आहे.
माजी खासदार व्ही. एस. उग्रप्पा यांना पुन्हा बेळ्ळारीतून उमेदवारी देण्याचा दबाव आहे. चामराजनगरसाठी मंत्री एच. सी. महादेवप्पा यांचे पुत्र सुनील बोस यांचे नाव निश्चित झाले असले तरी जातीच्या गणनेच्या आधारे काहीसा धक्का बसला आहे.
रक्षा रामय्या यांना चिक्कबळ्ळापूरचे तिकीट द्यावे, यासाठी मुख्यमंत्री वकिली करत असताना माजी मुख्यमंत्री वीरप्पा मोईली ही जागा सोडण्यास नकार देत आहेत. बिदरमध्ये आपल्या मुलाला तिकीट द्यावे, यासाठी मंत्री ईश्वर खांड्रे आग्रही आहेत.