जनतेला आर्थिक शक्ती देणे हाही एक विकासच : सिध्दरामय्या

पुण्यतिथीनिमित्त पं. नेहरूना अभिवादन, मोदींवर हल्लाबोल

बंगळूर : लोकांना सामाजिक आणि आर्थिक शक्ती देणे हा देखील विकास आहे. केवळ रस्ते, पूल आणि सिंचन बांधणे म्हणजे विकास नाही, असे मुख्यमंत्री सिद्धरामय्या म्हणाले. यावेळी पंतप्रधान नरेंद्र मोदी यांच्या धोरणावर त्यांनी जोरदार हल्लाबोल केला.
केपीसीसी कार्यालयात देशाचे माजी पंतप्रधान डॉ. पंडित जवाहरलाल नेहरू यांच्या पुण्यतिथी कार्यक्रमात बोलताना ते म्हणाले की, माजी मुख्यमंत्री कुमारस्वामी म्हणातात की, आमच्या सरकारचा विकास शून्य आहे. व्यक्तीची सामाजिक शक्ती मजबूत करणे हा देखील विकास आहे. त्यांनी हे सर्व केव्हा केले, पंतप्रधानांनी हे सर्व देशात केले का? असा त्यांनी सवाल केला.
विरोधकांना टीका करण्यापेक्षा सरकारची विकासकामे पाहू द्या. भाजपने अनुसूचित जाती-जमातींच्या लोकांसाठी काही केले आहे का, भाजपशासित राज्यात लोकांना सामाजिक आणि आर्थिकदृष्ट्या सक्षम केले आहे का, असा सवाल त्यांनी केला.
मोदींवर हल्लाबोल
पंतप्रधान मोदी निवडणूक हरणार हे माहीत असल्यासारखे बोलत आहेत. ते मतांसाठी हिंदू-मुस्लिमांमध्ये फूट पाडण्याचे कारस्थान करीत आहेत, असे ते म्हणाले.
प्रसारमाध्यमांशी संवाद साधताना मोदी आपण मुस्लिम समर्थक असल्याचे सांगतात, पण आपल्या भाषणात ते हिंदू-मुस्लिमांमध्ये फूट पाडणारे शब्द वापरतात. पराभवाच्या निराशेतून मोदी असे बोलत असल्याचे ते म्हणाले.
पंतप्रधान मोदी हे देवाचे अवतार आहेत आणि २०४७ पर्यंत सेवा करण्यासाठी त्यांना देवाने पाठवले आहे, अशी मुख्यमंत्री सिद्धरामय्या यांनी खिल्ली उडवली. आम्ही हिंदू राष्ट्र निर्माण करू, असे म्हणणे म्हणजे एक स्वप्न आहे. मोदींचा बहुलवादावर विश्वास नाही. काँग्रेस सत्तेत आल्यास सर्वांना सोबत घेऊन जाईल, असे सांगून ते म्हणाले की, केवळ काँग्रेसच संविधान समर्थक आहे.
भाजप आमच्या सरकारच्या कामगिरीबद्दल खोटे बोलत आहे. २८ जागा जिंकू असे म्हणणाऱ्या भाजपला आता सत्य कळले आहे. काँग्रेस कार्यकर्त्यांच्या मेहनतीने लोकसभेच्या १५ ते २० जागा जिंकू, असे ते म्हणाले.
भाजपचा संविधानावर विश्वास नाही. संविधानाच्या आकांक्षेनुसार केवळ काँग्रेस पक्षच देशाचे नेतृत्व करू शकतो. नेहरू आणि इंदिरा गांधी यांनी जमीन सुधारणा राबवून उद्योग उभारले. आता भाजप उलट करत आहे. शेतकऱ्यांच्या जमिनी काढून खासगी उद्योजकांना उद्योग विकणे हे भाजपचे कर्तृत्व आहे, असे ते म्हणाले.
जवाहरलाल नेहरू पंतप्रधान असताना त्यांनी लोकशाही आणि धर्मनिरपेक्षता या तत्त्वांवर देशाच्या विकासाचा पाया घातला. देशाच्या उभारणीसाठी त्यांनी १७ वर्षे काम केले. नेहरूंनीच भारताला जगातील सर्वात मोठा आणि बलशाली देश बनवला, असे सांगून ते म्हणाले.
यावेळी केपीसीसीचे अध्यक्ष डी. के. शिवकुमार, मंत्री दिनेश गुंडूराव, कार्याध्यक्ष के.सी. चंद्रशेखर, मंजुनाथ भंडारी, माजी मंत्री राणी सतीश, विधान परिषद सदस्य बी. हरिप्रसाद यांच्यासह अनेक नेते उपस्थित होते.
पक्ष संघटनेवर भर
राज्यात पक्ष मजबूत करण्यासाठी आणि कार्यकर्त्यांच्या समस्या ऐकण्यासाठी माझ्यासह सर्व मंत्री दर महिन्याला काँग्रेस कार्यालयात जाऊन तक्रारी ऐकून घेतात. मीही महिन्यातील अर्धा दिवस काँग्रेस कार्यालयात राहून कार्यकर्त्यांच्या आणि नेत्यांच्या समस्या ऐकतो. मुख्यमंत्री सिद्धरामय्या यांनी मंत्र्यांना पक्ष कार्यालयात भेट देऊन कार्यकर्त्यांच्या समस्या ऐकून घेण्याच्या सूचनाही देणार असल्याचे सांगितले. काँग्रेस पक्षाची मजबूत बांधणी करावी लागेल. आमच्या काँग्रेसने दहा वर्षे नव्हे, तर संपूर्णपणे प्रशासन चालवले पाहिजे, असे मुख्यमंत्री सिद्धरामय्या म्हणाले.