हर्षा साखर कारखान्यात इथेनॉल विभागाचे उद्घाटन, बॉयलर प्रदीपन

सौंदत्ती : सौंदत्ती येथील हर्षा साखर करखान्यात शुक्रवारी 100 केएल क्षमतेच्या इथेनॉल विभागाचे उद्घाटन, बॉयलर प्रदीपन व केन कॅरिअर पूजनाचा कार्यक्रम पार पडला. हुली मठाचे उमेश्वर महास्वामी संबय्यनवरमठ यांच्या उपस्थितीत झालेल्या कार्यक्रमात कारखान्याला सर्वाधिक ऊस पुरवठा करणार्‍या 10 शेतकर्‍यांचा सत्कार करण्यात आला.
2021-22 यावर्षी ज्या शेतकर्‍यांनी ऊस पुरवठा केला आहे अश्या सर्व शेतकर्‍यांना प्रति टन 100 रुपये ज्यादा देण्याची घोषणा कारखान्याच्या चेअरमन आमदार लक्ष्मी हेब्बाळकर यांनी यावेळी केली. एकूण 2021-22 हंगामात ऊस पुरवठा करणार्‍या शेतकर्‍यांना ऊस तोडणी आणि वाहतूक वगळून प्रतिटन 2700 रुपये दिले जातील. केंद्र सरकारने 2021-22 या वर्षासाठी निश्चित केलेल्या दरापेक्षा (एफआरपी) अधिक 198 जादा दर दिल्याचे होईल. 2022-23 या वर्षासाठीही केंद्र सरकारने ठरवून दिलेल्या एफआरपीनुसारच दर दिला जाईल असे सांगून यावर्षीही कारखान्याला दर्जेदार ऊस पाठवून सहकार्य करावे, असे आवाहनही अध्यक्षांनी केले.
कारखान्याचे व्यवस्थापकीय संचालक व विधानपरिषद सदस्य चन्नराज हट्टीहोळी, संचालक मृणाल हेब्बाळकर, वरिष्ठ अधिकारी सदाशिव थोरात, एन. एम. पाटील, यु. सी. चौकीमठ, ऊस उत्पादक शेतकरी, हितचिंतक आदी उपस्थित होते.