काँग्रेसचे अनेक आमदार भाजपमध्ये सामील होण्यास तयार : खासदार जगदीश शेट्टर

बेळगाव: सत्ताधारी काँग्रेसमध्ये असंतोष वाढत असल्याने राजू कागे यांच्यासह अनेक आमदार भाजपमध्ये सामील होण्यास तयार आहेत, असे खासदार जगदीश शेट्टर यांनी सोमवारी सांगितले.

बेळगावमध्ये माध्यमांशी बोलताना ते म्हणाले की, काँग्रेसमधील अंतर्गत संघर्ष दिवसेंदिवस वाढत आहे आणि सरकार पडण्याची वेळ जवळ येत आहे. मुख्यमंत्री बदलतील की नाही हे माहित नाही. पण सरकार जास्त काळ टिकणार नाही. आम्ही ऑपरेशन कमळ करणार नाही. पण हताश झालेले काँग्रेसचे आमदार स्वतःहून भाजपमध्ये सामील होतील. आम्ही त्यांना आकर्षित करण्याचा प्रयत्न करत नाही आहोत. ते स्वतःहून येतील, असे त्यांनी सांगितले.

वरिष्ठ आमदार उघडपणे आपला राग व्यक्त करत असल्याने, काँग्रेसमधील अंतर्गत कलह वाढला आहे. राज्य सरकारमध्ये भ्रष्टाचार बोकाळला आहे. सरकारमध्ये कोणतेही काम होत नाही. सरकार दिवाळखोरीत आहे आणि आर्थिक परिस्थिती चिंताजनक आहे. सत्ताधारी पक्ष कोणतेही काम होत नसल्याचे सांगत आहे. निविदा काढतात पण प्रत्यक्षात कामाचे आदेश मिळत नाहीत. सिद्धरामय्या, डी.के. शिवकुमार यांनी नैतिक जबाबदारी स्वीकारून राजीनामा द्यावा, अशी मागणी शेट्टर यांनी केली.