वारकऱ्यांच्या स्नेहभोजनाची १० वर्षाची परंपरा!

शिवाजी पठाडे यांचा उपक्रम : माऊलींच्या सेवेत भाविकही दंग
निपाणी (वार्ता) : गेल्या ३ वर्षापूर्वी कोरोना महामारीमुळे पंढरपूरच्या दिंड्या बंद झाल्या होत्या. गेल्या वर्षापासून हा संसर्ग कमी झाल्याने प्रशासनाने त्यांना परवानगी दिली आहे. त्यामुळे विविध भागातून दिंड्या पंढरपूरकडे प्रस्थान करीत आहेत. खडकेवाडा येथील दिंडी निपाणीमार्गे पंढरपूरकडे दरवर्षी जात असते. यंदाही सदरची दिंडी निपाणी मार्गे पंढरपूरकडे जात असताना येथील प्रगती नगरातील नागरिक शिवाजी पठाडे यांनी आपल्या घरी ही दिंडी मुक्कामाला ठेऊन वारकऱ्यांची सर्व ती सोय केली. त्यांच्या या स्नेहभोजनाचे यंदा दहावे वर्ष होते.
खडकेवाडा येथील माऊलीची दिंडी टाळ मृदुंगाच्या गजरात देवचंद कॉलेज मार्गे सायंकाळी निपाणीत पोहोचली. धर्मवीर संभाजीराजे चौक, अशोक नगर परिसरात मिरवणुकीने येथील प्रगती नगरात आली. या दिंडीचे यंदा बाविसावे वर्ष आहे. म्हाकवे येथील सिद्राम पाटील -महाराज, दिंडी प्रमुख आनंदा शिंदे यांच्या नेतृत्वाखाली ही दिंडी पंढरपूर कडे निघाली आहे. प्रारंभी शिवाजी पठाडे दाम्पत्यांच्या हस्ते त्यांच्या निवासस्थानी माऊलीची पूजाअर्चा करण्यात आली. त्यानंतर सदरची दिंडी मुक्कामासाठी येथील जय मल्हार सांस्कृतिक भवनात आली. तेथे भजनी मंडळाचा कार्यक्रम आणि आरती झाली. त्यानंतर वारकऱ्यांनी विविध प्रकारचे खेळ सादर केले. त्यामुळे भवन परिसर भक्तिभावाने न्हावून गेला. त्यानंतर वारक-यासह परिसरातील भाविकांसाठी स्नेहभोजनाचे आयोजन करण्यात आले होते. शिवाजी पठाडे यांच्या या उपक्रमाचे परिसरातून कौतुक होत आहे.
यावेळी सूर्यकांत पाटील, भगवान सुतार, दगडू मिटके, तुकाराम भोसले, मालन वागळे, माजी नगरसेवक दिलीप पठाडे, नगरसेविका अनिता पठाडे, रवींद्र इंगवले, बाबुराव मलाबादे, गजानन शिंदे, विश्वास नारे, सोमनाथ शिंपूकडे, अरुण खडके, तुकाराम कोराने, पांडुरंग पोवार, पुंडलिक सुतार, सचिन सावंत, सुकुमार सुतार,निलेश मोरे, जगदीश आरागडे, चोपदार गोपाळ सुतार, सतीश मसुरकर, संजय सुतार, रघुनाथ सुतार, शशिकांत हवालदार, प्रवीण येजरे, सतीश बल्लारी यांच्या शहर प्रगतीनगर, आंदोलननगर परिसरातील वारकरी व भाविक उपस्थित होते.