… तर ‘त्या’ २६ पर्यटकांचे जीव वाचले असते : मल्लिकार्जून खर्गे

‘गुप्तचर’च्या माहितीवरून मोदीनी रद्द केला होता काश्मीर दौरा

बंगळूर : गुप्तचर माहितीच्या आधारे काश्मीर दौरा रद्द केलेले पंतप्रधान नरेंद्र मोदी यांनी लोकांना याबद्दल सावध केले असते तर २६ पर्यटकांचे प्राण वाचवता आले असते, असे राज्यसभेतील विरोधी पक्षनेते आणि एआयसीसी अध्यक्ष मल्लिकार्जुन खर्गे यांनी मंगळवारी म्हटले आहे.
२२ एप्रिल रोजी काश्मीरमधील पहलगाम येथे झालेल्या दहशतवादी हल्ल्यात २६ पर्यटकांचा मृत्यू झाला होता.
काँग्रेस सरकारला दोन वर्षे पूर्ण झाल्यानिमित्त आज विजयनगर जिल्ह्यातील होस्पेट येथे आयोजित साधना समावेशात बोलताना, खर्गे यांनी पहलगाममधील पर्यटकांच्या सुरक्षिततेची खात्री न केल्याबद्दल आणि सर्वपक्षीय बैठकीला गैरहजर राहिल्याबद्दल पंतप्रधान मोदींवर तीव्र हल्ला चढवला.
पहलगाम दहशतवादी हल्ला सुरक्षेच्या अपयशामुळे झाला असे खर्गे म्हणाले. पोलिस, सीमा सुरक्षा दल किंवा लष्कराकडून पर्यटकांना कोणतीही सुरक्षा देण्यात आली नव्हती. आतापर्यंत मोदी एकही शब्द बोललेले नाहीत किंवा (सुरक्षेच्या अपयशाबद्दल) कोणतेही उत्तर दिलेले नाही. मोदींचा काश्मीर दौरा १७ एप्रिल रोजी होणार होता. परंतु गुप्तचर अधिकाऱ्यांनी परवानगी दिली नाही. म्हणून, त्यांचा दौरा रद्द करण्यात आला. तुम्ही तुमचा काश्मीर कार्यक्रम रद्द केला. पण तुम्ही पर्यटकांना इशारा का दिला नाही? जर तुम्ही त्यांना इशारा दिला असता तर २६ जणांचे जीव वाचू शकले असते, असे खर्गे म्हणाले.
पाकिस्तानकडे आपल्याशी लढण्यासाठी स्वतःची ताकद नाही. आपल्याशी लढण्यासाठी त्याला चीनचा पाठिंबा मिळाला. २२ एप्रिल रोजी बंगळुरमध्ये मी म्हटले होते की देश सरकारला पाठिंबा देण्यासाठी एकत्र येईल आणि आपण सर्वजण एकत्र येऊन युद्ध लढू आणि देशाचे हित जाती आणि धर्मापेक्षा महत्त्वाचे आहे. आपण आपले प्राण देऊ. पण भाजपसाठी मोदी देशापेक्षा महत्त्वाचे आहेत. काँग्रेस हा देशासाठी बलिदान देणाऱ्यांचा पक्ष आहे. महात्मा गांधी, इंदिरा गांधी, राजीव गांधी यांनी या देशासाठी बलिदान दिले, असे ते म्हणाले.
आम्ही देशासाठी सर्वपक्षीय बैठकीला बसलो होतो तेव्हा मोदी निवडणूक प्रचारासाठी बिहारला गेले होते. त्यांनी दोनदा सर्वपक्षीय बैठक बोलावली, पण ते आले नाहीत. जर तुम्ही देशभक्त असाल आणि देशावर प्रेम असेल तर आम्हाला बोलावल्यानंतर तुम्ही का आला नाही? जर आम्ही सर्वपक्षीय बैठकीला उपस्थित राहिलो नसतो तर आम्हाला देशद्रोही ठरवले असते. पण जरी ते बैठकीला उपस्थित राहिले नसले तरी त्यांना देशभक्त म्हटले जात आहे. देशाच्या कल्याणाबद्दल फक्त बोलणे शक्य नाही, सर्वांना सोबत घेऊन जाणे महत्त्वाचे आहे, असे ते म्हणाले.
कर्नल सोफिया कुरेशी यांच्याबद्दल अपमानास्पद टिप्पणी केल्याबद्दल मध्य प्रदेशातील भाजप मंत्री विजय शाह यांना मंत्रिपदावरून काढून टाकण्याची मागणी केली होती असे सांगून खर्गे म्हणाले, आम्ही त्यांचा राजीनामा मागितला आहे. पण मोदी अजूनही त्यांना मंत्रिमंडळात ठेवतात. आधी भाजपमधील त्या गद्दारांना काढून टाका आणि नंतर बोला.