मुख्यमंत्री बदलाबाबत आमदार, खासदारांशी चर्चा नाही

रणदीप सिंह सुरजेवाला; बैठकांचा सपाटा सुरूच

बंगळूर : राज्यातील नेतृत्व बदलावर अभिप्राय गोळा करण्याची शक्यता एआयसीसीचे सरचिटणीस आणि पक्षाचे कर्नाटक प्रभारी रणदीप सिंग सुरजेवाला यांनी मंगळवारी फेटाळून लावली. दरम्यान, सुरजेवाला यांनी आमदारांच्या बैठका घेऊन त्यांच्या कामाचा अहवाल व त्यांच्या तक्रारी ऐकून घेण्याचे काम आज दुसऱ्या दिवशीही सुरूच ठेवले आहे.
सुरजेवाला यांनी स्पष्ट केले की, मी आमदार आणि खासदारांना त्यांच्या मतदारसंघात होत असलेल्या कामाच्या कामगिरीचा आढावा घेण्यासाठी भेटत आहे. काही लोकांनी मला विचारले की मी नेतृत्व बदलाबाबत आमदार आणि खासदारांचे विचार गोळा करत आहे का. मी काल दिलेलेच उत्तर पुन्हा देत आहे. एका शब्दात, स्पष्ट ‘नाही’,” असे त्यांनी पत्रकार परिषदेत सांगितले.
केपीसीसी अध्यक्ष आणि उपमुख्यमंत्री डी. के. शिवकुमार यांच्यासोबत असलेले सुरजेवाला म्हणाले की, मी पक्षाचे आमदार, खासदार, विधान परिषद सदस्य आणि लोकसभा निवडणूक लढवलेल्या उमेदवारांसोबत बैठक घेणार आहे.
येत्या सात ते आठ दिवसांत सर्व आमदारांना भेटणार असल्याचेही त्यांनी सांगितले.
“आम्ही आमदार आणि खासदारांना भेटत आहोत. गेल्या दोन वर्षात त्यांनी त्यांच्या मतदारसंघात काय केले आहे, हे समजून घेण्याचा आम्ही प्रयत्न करत आहोत. त्यांच्या कामगिरीचा आढावा घेणे महत्त्वाचे आहे,” असे ते म्हणाले.
“आमदारांची मतदारसंघातील जनतेप्रती असलेली जबाबदारी आणि काँग्रेस पक्षाने दिलेली निवडणूक आश्वासने पूर्ण करण्यास ते वचनबद्ध आहेत. म्हणून, मी आमदारांना त्यांचे रिपोर्ट कार्ड देण्यास सांगत आहे. पाच हमींच्या अंमलबजावणीची स्थिती पाहणे आवश्यक आहे,” असे ते म्हणाले.
काँग्रेस नेत्यांनी सांगितले की, आमदारांना ब्लॉक काँग्रेस कमिटी, विधानसभा काँग्रेस कमिटीची स्थिती आणि त्यांनी वेळोवेळी घेतलेल्या पक्षाच्या बैठकांची संख्या याबद्दलही विचारले जाईल.
“आम्ही त्यांना (आमदारांना) विचारत आहोत की त्यांच्या काही समस्या किंवा आकांक्षा आहेत का. प्रत्येक आमदाराच्या काही आकांक्षा असतात किंवा त्या क्षेत्रात आणखी काही काम करायचे असते. त्यांच्या आकांक्षा सरकारला कळवल्या जातील आणि प्राधान्याने जे सर्वोत्तम करता येईल ते घेतले जाईल,” असे त्यांनी स्पष्ट केले.
आमदारांनंतर, मंत्र्यांकडून त्यांची भेट घेतली जाईल आणि त्यांनी त्यांच्या मतदारसंघात काय केले आहे हे समजून घेतले जाईल. एनएसयूआय, महिला काँग्रेस, एससी/एसटी आणि ओबीसी, अल्पसंख्याक, किसान विभाग आणि युवक काँग्रेस यासारख्या संघटनांची भूमिका तपासली जाईल, असे ते म्हणाले.
“कर्नाटकातील विकासासाठी सरकारकडे पैसे नाहीत. त्यांना हमीयोजना थांबवायच्या आहेत, असे सांगून भाजप राज्यात खोटारडेपणा पसरविण्याचा प्रयत्न करीत आहे. आर. अशोकापासून विजयेंद्रपर्यंत भाजप नेत्यांना पाच हमीयोजना थांबवायच्या आहेत. त्यांना ५८,००० कोटी रुपये लोकांच्या खात्यात पारदर्शक पद्धतीने जाऊ नयेत, अशी इच्छा आहे, असा आरोप त्यांनी केला.
काँग्रेस नेत्यांनी सांगितले की पाच हमी कधीही थांबवता येणार नाहीत. काही काँग्रेस आमदारांनी त्यांच्या मतदारसंघात विकासकामे केली जात नसल्याच्या आरोपांना उत्तर देताना, कर्नाटक सरकारकडे पुरेसा पैसा असल्याचे ते म्हणाले.
सरकारविरुद्ध जाहीरपणे वक्तव्य करणाऱ्या आमदारांबद्दल बोलताना ते म्हणाले, “पक्षात काहीही झाले तरी त्यांनी पक्षातच राहिले पाहिजे. मी आमदारांनाही सल्ला दिला आहे. जर त्यांना काही समस्या असतील तर ती उघडपणे व्यक्त करण्याऐवजी संबंधित लोकांशी चर्चा करण्याचा सल्ला मी त्यांना दिला आहे. शिवकुमार पीसीसीमध्ये आहेत आणि सिद्धरामय्या सरकारमध्ये आहेत.”

साखळी बैठका सुरूच
दरम्यान, रणदीप सिंग सुरजेवाला यांनी मंगळवारी सलग दुसऱ्या दिवशीही राज्यातील सत्ताधारी पक्षाच्या आमदारांसोबतच्या बैठका सुरूच ठेवल्या.
पहिल्या टप्प्यात, सुरजेवाला आज बंगळुर शहर, बंगळुर ग्रामीण, बंगळुर दक्षिण, चामराजनगर, म्हैसूर, दक्षिण कन्नड आणि कोलार येथील सुमारे २० आमदारांना भेटतील, असे पक्षाच्या सूत्रांनी सांगितले.
सोमवारी त्यांनी चिक्काबळ्ळापुर आणि कोलार जिल्ह्यातील आमदारांची बैठक घेतली. अनेक आमदारांनी काही मंत्र्यांच्या कामगिरीवर नाराजी व्यक्त केली आणि तक्रारींचा वर्षाव केल्याचे समजते. मंत्री त्यांना प्रतिसाद देत नाहीत. त्यांनी सल्ला देण्याची मागणी केली होती. आजही सुरजेवाला यांना भेटलेल्या आमदारांनी काही मंत्र्यांच्या कामगिरीबद्दल असमाधान व्यक्त करत तक्रारींचा वर्षाव केला आहे.
काँग्रेस सरकार सत्तेत येऊन दोन वर्षे झाली तरी मतदारसंघाच्या विकासासाठी आम्हाला निधी मिळत नाहीये. मंत्री आमच्या शब्दांकडे लक्ष देत नाहीत. आमच्या पत्रांना कोणताही प्रतिसाद मिळत नाहीये. अधिकारी आमचे ऐकत नाहीत, अशा शब्दांत आजही अनेक आमदारांनी सुरजेवाला यांच्यासमोर आपल्या तक्रारी मांडल्या.
आज बंगळुरचे आमदार एन.ए. हॅरिस, रिझवान, एम. कृष्णप्पा, प्रिया कृष्णा, आणेकलचे आमदार शिवण्णा, ए. सी. श्रीनिवास, होस्कोटचे आमदार शरथ बच्चेगौडा, मालूरचे आमदार के.वाय. नंजेगौडा, चिक्कमंगळूरचे आमदार तिम्मय्या, तारिकेरेचे आमदार शिवशंकर, रामनगराचे आमदार इक्बाल हुसेन, मगडीचे आमदार एच.सी. बालकृष्ण, चन्नपटणचे आमदार योगेश्वर आणि इतर अनेक आमदारांनी सुरजेवाला यांची भेट घेतली आणि त्यांच्या तक्रारी आणि राज्य सरकारबद्दल त्यांचे मत मांडले.