Belgaum Varta Belgaum Varta
बंगळूर : येथील राजभवन परिसरात बॉम्ब ठेवल्याचा फसवा कॉल करणाऱ्या व्यक्तीला कर्नाटकातील चित्तूर येथून अटक करण्यात आली, अशी माहिती पोलिसांनी बुधवारी दिली.
आरोपी भास्कर (वय ३४) हा बीकॉम पदवीधर असून तो शेतीचा व्यवसाय करतो आणि तो कोलार जिल्ह्यातील मुलबागल तालुक्यातील वडाहळ्ळी गावचा आहे, असे त्यांनी सांगितले.
पोलिसांनी दिलेल्या माहितीनुसार, ११ डिसेंबरच्या रात्री येथील राजभवन परिसरात बॉम्ब ठेवला असून तो कधीही फुटू शकतो, असा दावा करणाऱ्या एका फोन कॉलने शहर पोलिसांमध्ये खळबळ उडवून दिली होती.
पोलिसांनी गव्हर्नरच्या अधिकृत निवासस्थानावर सगळीकडे चकरा मारल्या आणि शेवटी निष्कर्ष काढला की हा फसवा कॉल होता. तपासात असे दिसून आले की आरोपी सोमवारी रात्री बंगळुरला आला होता आणि राजभवनाजवळून जात असताना त्याने गुगलवर एनआयएच्या (नॅशनल इन्व्हेस्टिगेशन एजन्सी) कंट्रोल रूमचा संपर्क क्रमांक शोधला आणि राजभवनाच्या आवारात बॉम्ब ठेवल्याचा दावा करून कॉल केला.
बॉम्बच्या धमकीबाबत शहर पोलिसांना तत्काळ सतर्क करण्यात आले व आवश्यक ती कारवाई करण्यात आली. नंतर तपासात असे दिसून आले की बॉम्बची धमकी हा फसवा कॉल होता, असे एका वरिष्ठ पोलीस अधिकाऱ्याने सांगितले.
सुरुवातीला हा कॉल बिदरमधून केल्याचे उघड झाले असून कथित कॉलनंतर मोबाईल बंद असल्याचे आढळून आले. तथापि, नंतर, तांत्रिक पाळत ठेवून, पोलिसांनी चित्तूर येथे कॉलरचा शोध लावला जिथून आरोपी भास्करला मंगळवारी रात्री अटक करण्यात आली, असे त्यांनी सांगितले.
“आरोपींने उत्सुकतेपोटी कॉल केला. त्याच्या कृतीचे परिणाम काय होतील याचा त्याने विचार केला नाही. आम्ही त्याची पार्श्वभूमी तपासली असून त्याच्यावर पूर्वीचे कोणतेही गुन्हे नोंद नाहीत. आम्ही त्याच्याविरुद्ध गुन्हा दाखल करून मंगळवारी संध्याकाळी अटक केली,” असे ते म्हणाले.
