कर्नाटकात २०.८५ कोटी रुपये, २७ कोटींची दारू जप्त

बंगळूर : लोकसभा निवडणुकीच्या पार्श्वभूमीवर १६ मार्चपासून आदर्श आचारसंहिता लागू झाल्यापासून, कर्नाटकमध्ये २०.८५ कोटी रुपयांची रोकड आणि २७ कोटी रुपयांची दारू जप्त करण्यात आली आहे, असे निवडणूक आयोगाने शुक्रवारी सांगितले.
कर्नाटकात २६ एप्रिल आणि ७ मे रोजी दोन टप्प्यात २८ मतदारसंघांसाठी लोकसभा निवडणुका होणार आहेत. आतापर्यंत जप्त केलेली एकूण किंमत ६२.४२ कोटी रुपये आहे.
कर्नाटकच्या मुख्य निवडणूक अधिकाऱ्यांच्या कार्यालयाने प्रसिद्ध केलेल्या निवेदनानुसार, आदर्श आचारसंहिता लागू झाल्यापासून, उड्डाण पथके, अंमलबजावणी पथके आणि पोलिस अधिकाऱ्यांनी २०.८५ कोटी रुपये रोख, ७०.८६ लाख रुपयांच्या मोफत भेटवस्तू, २७ कोटीपेक्षा अधिक ८.६३ लाख लिटर दारू आणि १.४७ कोटी रुपयांपेक्षा जास्त किमतीचे २११.२३ किलो ड्रग्ज, ९ कोटी रुपयांपेक्षा जास्त किमतीचे १५ किलो सोने, २७ लाख रुपयांपेक्षा जास्त किमतीचे ५९.०४ किलो चांदी आणि नऊ लाख रुपये किमतीचे २१.१७ कॅरेटहिरे आणि इतर दागिने जप्त करण्यात आले.
पैसे, दारू, ड्रग्ज, दागिने आणि मोफत वस्तू जप्त केल्याप्रकरणी ९६९ एफआयआर नोंदवण्यात आल्याची माहिती निवडणूक आयोगाने दिली आहे.