गणेशोत्सव शांततेत व उत्साहात साजरा करा : जिल्हाधिकारी मोहम्मद रोशन

बेळगाव : बेळगाव जिल्ह्यात गणेशोत्सव मोठ्या भव्य दिव्य स्वरूपात साजरा केला जातो असतो. दरवर्षीप्रमाणे यावर्षी ही गणेशोत्सव भव्यतेने साजरा करू या. गणेशोत्सव साजरा करण्यासाठी सर्वांनी प्रशासनाला सहकार्य करावे, असे आवाहन जिल्हाधिकारी मोहम्मद रोशन यांनी केले आहे.
कुमार गंधर्व कला मंदिरात आयोजित गणेशोत्सवाच्या पुर्वतयारी बैठकीच्या अध्यक्षस्थानी ते बोलत होते.

यावेळी पुढे बोलताना मोहम्मद रोशन म्हणाले, गणेशोत्सव साजरा करण्याच्या नावाखाली बेकायदेशीर कृत्ये होऊ नयेत यासाठी खबरदारी घ्यावी. पर्यावरणाचे नुकसान होऊ नये म्हणून शाडू मातीच्या गणेशमूर्ती बसवणे आवश्यक आहे आणि मूर्ती बसवण्यापूर्वी मंडळाना परवानगी घेणे बंधनकारक आहे. गणेश विसर्जनाच्या वेळी गैरसोय होऊ नये म्हणून विभागांनी महानगरपालिकेशी समन्वय साधून धोकादायक झाडे, विजेच्या तारा आणि केबल्स विसर्जन मार्गावरून काढून टाकावेत. गणेशोत्सवादरम्यान अग्निशमन विभागाला चोवीस तास काम करण्यास सज्ज राहण्याचे निर्देश त्यांनी दिले आणि शहरातील सर्व गणेश मंडपांमध्ये कर्मचारी तैनात करण्यास सांगितले.

गणेश विसर्जनादरम्यान फटाके वाजवण्यास सक्त मनाई आहे. बॅनर आणि बंटिंग लावण्यासाठी परवानगी बंधनकारक आहे. गणेश विसर्जन स्थळांवर कुशल जलतरणपटूंची नियुक्ती करावी. गणेशोत्सवासाठी येणाऱ्या जनतेच्या सोयीसाठी फिरते शौचालय आणि स्वच्छ पिण्याच्या पाण्याची व्यवस्था करण्याचे निर्देशही त्यांनी महानगरपालिकेच्या अधिकाऱ्यांना दिले. गणेशोत्सवाची संपूर्ण जबाबदारी विभागांनी घ्यावी असे ते म्हणाले. सर्व विभाग अधिकाऱ्यांच्या तक्रारींची त्वरित दखल घ्यावी. सर्व विभाग अधिकाऱ्यांनी महामंडळांशी समन्वय साधून काम करावे असे निर्देश जिल्हाधिकारी मोहम्मद रोशन यांनी दिले.

पोलीस आयुक्त भूषण गुलबाराव भोरसे म्हणाले की, गणेशोत्सव शांततेत आणि उत्साहात पार पाडण्यासाठी सर्व स्थानिक पोलीस ठाण्यांच्या अधिकाऱ्यांची बैठक बोलावून आवश्यक व्यवस्था करण्याचे निर्देश देण्यात आले आहेत. पोलीस विभागाबाबत शहरातून तक्रारी आल्यानंतर ४८ तासांच्या आत पोलीस विभाग समस्यांचे निराकरण करण्यासाठी तात्काळ कार्यवाही करेल असे ते म्हणाले.

डीजे बसवण्याच्या मार्गदर्शक तत्वांचे उल्लंघन करणाऱ्यांवर कारवाई केली जाईल. सर्वोच्च न्यायालयाच्या आदेशानुसार रात्री १० नंतर लाऊडस्पीकर वापरण्यास मनाई आहे. गणेश विसर्जनादरम्यान ज्या रस्त्यांवर मूर्ती जातात त्या रस्त्यांवर ६४ हून अधिक लहान-मोठी रुग्णालये आहेत. जर गणेश मूर्तींचे विसर्जन निश्चित वेळेत केले तर जनतेला, रुग्णालयातील रुग्णांना कोणताही त्रास होणार नाही. गणेश मूर्ती जास्त उंच नसाव्यात. यामुळे संभाव्य आपत्ती टाळता येतील. परवानगी असलेले कार्यक्रम निर्धारित वेळेत पूर्ण करावेत. गणेश महामंडळांनी स्वयंसेवक नियुक्त करावेत आणि गणेश विसर्जनाच्या सुरुवातीपासून शेवटपर्यंत उपस्थित राहावेत. याशिवाय, मंडळांच्या प्रमुखांनी पोलिस कर्मचाऱ्यांशी सतत संपर्कात राहावे. गणेशोत्सवादरम्यान कोणताही दंगल किंवा सामाजिक गोंधळ आढळल्यास अशा लोकांवर कोणत्याही आडकाठीशिवाय कारवाई केली जाईल, असे ते म्हणाले.

यावेळी बोलताना विविध गणेश उत्सव महामंडळांच्या अध्यक्षांनी आणि पदाधिकाऱ्यांनी सांगितले की, शहरात गेल्या अनेक वर्षांपासून पारंपारिक आणि भव्य गणेशोत्सव साजरा केला जात आहे. देशातील दुसऱ्या क्रमांकाचा गणेशोत्सव उत्सव आपल्या जिल्ह्यात होतो. गणेश मूर्ती विसर्जनासाठी सुमारे ८ खड्डे आहेत, त्यातील सर्व खड्डे स्वच्छ करावेत. गणेश मंडपांना योग्य पोलिस सुरक्षा पुरवावी असे आवाहन त्यांनी केले.

गणेश मूर्ती पाहण्यासाठी येणाऱ्या लोकांमध्ये महिला आणि मुले मोठ्या संख्येने येतात, त्यामुळे आवश्यक सुविधा उपलब्ध करून द्याव्यात. रात्री उशिरापर्यंत हॉटेल्स उघडी ठेवण्याचे आणि शहरातील गणेशोत्सव पाहण्यासाठी इतर शहरांमधून येणाऱ्या लोकांच्या सोयीसाठी योग्य वाहतूक व्यवस्था करण्याचे आवाहन त्यांनी केले.

महानगरपालिका आयुक्त शुभा बी, अतिरिक्त पोलीस अधीक्षक आर. बी. बसरगी, डीसीपी बरमणी, जिल्हा पंचायत उपसचिव बसवराज हेगनायक, नगरसेवक, गणेश मंडळांचे अध्यक्ष, पदाधिकारी, विविध गणेश महामंडळांचे सदस्य आणि विविध विभागाचे अधिकारी बैठकीला उपस्थित होते.