जिल्हाधिकारी मोहम्मद रोशन यांनी बोटीतून घेतला पूर परिस्थितीचा आढावा!

चिक्कोडी : महाराष्ट्रात मुसळधार पावसाचा जोर असल्यामुळे चिक्कोडी तालुक्यातील नद्या दुथडी भरून वाहत आहेत. त्यामुळे संभाव्य पूर परिस्थितीच्या पार्श्वभूमीवर, जिल्हाधिकारी मोहम्मद रोशन यांनी आज चिक्कोडी तालुक्यातील यड्डूर गावातील कृष्णा नदीतील पूर परिस्थितीचा बोटीतून आढावा घेतला.

जिल्हाधिकारी मोहम्मद रोशन यांनी पूर परिस्थितीला तोंड देण्यासाठीच्या तयारीचा आढावा घेतला. शेजारच्या महाराष्ट्रात वाढलेल्या पावसामुळे बेळगाव जिल्ह्यात नद्यांचा प्रवाह वाढला आहे. आज त्यांनी चिक्कोडी तालुक्यातील मांजरी आणि यड्डूर गावातील पूर परिस्थितीचा आढावा घेतला. नंतर, त्यांनी स्थानिक अधिकाऱ्यांशी चर्चा केली आणि त्यांना पूर प्रतिबंधात्मक उपाययोजना करण्याच्या सूचना दिल्या.

याप्रसंगी जिल्हा पंचायतीचे मुख्य कार्यकारी अधिकारी राहुल शिंदे, प्रोबेशनरी आयएएस अधिकारी अभिनव जैन, डीवायएसपी गोपालकृष्ण गौडा, उपविभागीय अधिकारी सुभाष संपगावी, तहसीलदार राजेश बुर्ली, विविध विभागांचे अधिकारी आणि ग्रामस्थ उपस्थित होते.