बोरगाव शर्यतीत मिरजेची बैलगाडी प्रथम

निपाणी (वार्ता) : बोरगाव येथील भाजीपाला मित्रमंडळ यांच्या वतीने दीपावलीनिमित्त आयोजित जनरल बैलगाडी शर्यतीत मिरज येथील शंकर घोगरे यांच्या बैलगाडीने प्रथम क्रमांक मिळवून रोख १५००१ व निशान बक्षीस मिळविले. प्रारंभी युवा नेते उत्तम पाटील यांच्या हस्ते शर्यत मैदानाचे उद्घाटन करण्यात आले.

बैलगाडी शर्यतीत बंडा खिलारे-दानोळी द्वितीय, प्रवीण डांगरे- इचलकरंजी यांच्या गाडीने तृतीय क्रमांक मिळविले. त्यांना अनुक्रमे १५ हजार, १० हजार व ७ हजार रुपयाचे बक्षीस देण्यात आले. जनरल घोडा बैल शर्यतीत बंडा हसवे-हावेरी प्रथम, अभय गोरवाडे- बोरगाव द्वितीय व सदाशिव पाटील बस्तावडे यांच्या गाडीने तृतीय क्रमांक मिळविले. त्यांना अनुक्रमे ७ हजार, ५ हजार व ३ हजार रुपयांचे बक्षीस देण्यात आले.

जनरल घोडा-गाडी शर्यतीत शिवाजी निकम-बोरगाव प्रथम, अभय गोरवाडे- बोरगाव द्वितीय व सचिन पाटील- चंदूर यांच्या घोडा गाडीने तृतीय क्रमांक मिळवले. त्यांना अनुक्रमे ७ हजार, ५ हजार व ३ हजार रुपयांचे बक्षीस व निशान देण्यात आले. सर्व बक्षीस भाजीपाला मित्र मंडळ यांच्या वतीने देण्यात आले. दिवाळीनिमित्त आयोजित शर्यती पाहण्यास नगरसेवक, भाजीपाला मित्र मंडळाचे पदाधिकारी शहरवासीय तसेच शर्यत शौकीन उपस्थित होते.