ऐतिहासिक दसरा सोहळ्याच्या यशस्वी नियोजनाबद्दल उपायुक्त लक्ष्मी निपाणीकर यांचा सत्कार

बेळगाव : बेळगावच्या ऐतिहासिक दसरा सोहळ्याचे यंदा शिस्तबद्ध नियोजन आणि उत्तम व्यवस्थापन केल्याबद्दल महानगरपालिकेच्या उपायुक्त लक्ष्मी निपाणीकर यांचा मध्यवर्ती सार्वजनिक नवरात्र-दसरा महोत्सव महामंडळाच्या वतीने सत्कार करण्यात आला. त्यांच्या निवासस्थानी जाऊन शाल व श्रीफळ देऊन त्यांचा गौरव करण्यात आला.

बेळगावचा ऐतिहासिक दसरा सोहळा यंदा शांततेत, भक्तिमय वातावरणात आणि कोणतीही अनुचित घटना न घडता उत्साहात पार पडला. या सोहळ्याच्या यशस्वी आयोजनात महानगरपालिका प्रशासनाने महत्त्वपूर्ण भूमिका बजावली. उपायुक्त लक्ष्मी निपाणीकर यांनी उत्सवाच्या पूर्वतयारीपासून विविध प्रशासकीय कामांपर्यंत विशेष लक्ष देत नियोजन केले. तसेच पोलीस प्रशासन, हेस्कॉम आणि महानगरपालिकेच्या विविध विभागांमध्ये समन्वय साधल्यामुळे उत्सवाचे व्यवस्थापन सुरळीत झाले.

दसरा सोहळ्यात सहभागी होणाऱ्या भाविकांना आवश्यक सुविधा उपलब्ध करून देणे, स्वच्छता, विद्युत व्यवस्था, वाहतूक आणि सुरक्षिततेच्या दृष्टीने आवश्यक नियोजन करण्यासाठी प्रशासनाने प्रयत्न केले. या कामांमध्ये उपायुक्त निपाणीकर यांनी घेतलेल्या पुढाकाराचे महामंडळाच्या पदाधिकाऱ्यांनी कौतुक केले.

बेळगावच्या ऐतिहासिक दसरा परंपरेचे जतन करताना प्रशासन, देवस्थानांचे प्रमुख, उत्सव मंडळे आणि नागरिक यांच्यातील समन्वय महत्त्वाचा आहे. यंदाच्या उत्सवात विविध यंत्रणांनी केलेल्या सहकार्यामुळे सोहळा यशस्वी झाल्याचे मत यावेळी उपस्थितांनी व्यक्त केले.

पुढील वर्षी अधिक भव्य दसरा साजरा करणार

यावेळी उपायुक्त लक्ष्मी निपाणीकर यांनी पुढील वर्षीही बेळगावचा ऐतिहासिक दसरा अधिक भव्य आणि चांगल्या पद्धतीने साजरा करण्यासाठी महानगरपालिका आवश्यक सहकार्य करेल, असा विश्वास व्यक्त केला. त्यांच्या या भूमिकेचे महामंडळाच्या पदाधिकाऱ्यांनी स्वागत केले.

या सत्कारप्रसंगी मध्यवर्ती सार्वजनिक नवरात्र-दसरा महोत्सव महामंडळाचे अध्यक्ष प्राचार्य आनंद आपटेकर, जनसंपर्क प्रमुख विकास कलघटगी, मल्लेश चौगुले, श्री देव दादा सासनकाठी चव्हाट गल्लीचे श्रीनाथ पवार, गिरीश पाटील, कसई गल्ली मातंगी देवस्थानचे बद्रू पुजारी, वीरभद्र देवस्थान अशोक नगरचे मुर्गेंद्र अंगडी, प्रसाद मरगाळे, विनायक बुरुड यांच्यासह महामंडळाचे पदाधिकारी आणि विविध देवस्थानांचे प्रतिनिधी उपस्थित होते.

बेळगावच्या ऐतिहासिक दसरा सोहळ्याच्या यशस्वी आयोजनासाठी सहकार्य करणाऱ्या महानगरपालिका प्रशासनासह सर्व संबंधित विभागांचे महामंडळाच्या वतीने आभार मानण्यात आले. आगामी वर्षीही सर्वांच्या सहकार्याने दसरा सोहळा अधिक भव्य आणि शिस्तबद्ध पद्धतीने साजरा करण्याचा निर्धार यावेळी व्यक्त करण्यात आला.