एसटी आरक्षणासाठी धनगर समाजाचा विधानसौधलला २७ रोजी धडक

निपाणी (वार्ता) : धनगर समाज हा बऱ्याच वर्षापासून विकासात मागे पडला आहे. समाजाच्या प्रगतीसाठी अनुसूचित जमाती (एसटी) मध्ये समाविष्ट करण्यासाठी राज्य सरकारने केंद्र सरकारला शिफारस करावी, या मागणीसाठी बेळगाव येथे सुरू असलेल्या अधिवेशनात कर्नाटक प्रदेश कुरुबर संघ, कर्नाटक राज्य हालुमत महासभा, आणि बेळगाव जिल्हा धनगर समाज संघटनेतर्फे मंगळवारी बेळगाव येथे विधानसौदसमोर सत्याग्रह करून मुख्यमंत्र्यांना निवेदन देण्यात येणार आहे. यावेळी धनगर समाज बांधवांनी उपस्थित राहण्याचे आवाहन चिकोडी जिल्हा काँग्रेस अध्यक्ष व कर्नाटक राज्य धनगर समाजाचे माजी अध्यक्ष लक्ष्मण चिंगळे  यांनी केले आहे. गुरुवारी (ता.२२) येथे आयोजित धनगर समाज बांधवांच्या बैठकीत ते बोलत होते.

चिंगळे म्हणाले, यापूर्वी जगद्गुरु निरंजनानंदपुरी स्वामींच्या उपस्थितीत कागीनेले ते बंगळुरू पदयात्रा काढून कर्नाटक सरकारला याबाबत निवेदनाद्वारे विनंती केली होती. कुल शास्त्रीय अध्ययन संस्थेने राज्यात धनगर समाजाचे जीवनक्रम, शिक्षण,आर्थिक, सामाजिक, सांस्कृतिक जडणघडणीची माहिती, अनुसूचित जमातीसाठी लागणाऱ्या सर्व अटी समाजाने पूर्ण केले आहेत. त्याबाबतचा अहवाल कर्नाटक शासनाकडे सुपूर्द केला आहे. राज्य सरकारने बेळगाव येथील अधिवेशनात त्याची शिफारस त्वरित केंद्राकडे करावी. याबाबत हा मोर्चा आयोजित केला असून त्याचे निवेदन ही मुख्यमंत्र्यांना देण्यात येणार आहे. त्यामुळे यावेळी उत्तर कर्नाटक सह परिसरातील समाज बांधवांनी सहभागी व्हावे. मंगळवारी (ता.२७) सकाळी ९ वाजता येथील शासकीय विश्रामधामावर समाजबांधव एकत्रित येऊन १० वाजता बेळगावच्या दिशेने रवाना असल्याचे चिंगळे यांनी सांगितले.

यापूर्वी कर्नाटक हलुमत महासभेचे अध्यक्ष रुद्रन्ना गुळगुळी यांच्या नेतृत्वाखाली बंगळुरू येथील फ्रीडम पार्कमध्ये या मागणीसाठी सत्याग्रह करण्यात आला होता.

या मोर्चामध्ये कर्नाटक प्रदेश धनगर समाजाचे राज्याध्यक्ष सुब्रमण्यम, प्रधान कार्यदर्शी व्यंकटेश मूर्ती, माजी कार्यदर्शी के एम रामचंद्रअप्पा, सन्नकी, बेळगाव जिल्हा धनगर समाज अध्यक्ष मड्याप्पा तोळण्णावर यांच्यासह मान्यवर सहभागी होणार आहेत. बैठकीस निपाणी तालुका धनगर समाजाचे उपाध्यक्ष श्रीकांत बन्ने, माजी जिल्हा पंचायत सदस्य अशोक आरगे, कल्लाप्पा डोणे, ग्रामपंचायत सदस्य रामा बन्ने, चंद्रकांत मुधाळे, मंजुनाथ हिरवे, सिद्राम पुजारी, सिद्धलिंग चिगरे, बाबाजी बन्ने, सुरेश भानसे, बी. एम. चिंगळे यांच्यासह समाज बांधव उपस्थित होते.