Belgaum Varta Belgaum Varta
बेळगाव (प्रतिनिधी) : आपली सुंदर परंपरा, संस्कृती, निसर्ग आणि स्त्रीशक्तीचा समृद्ध वारसा जपण्याच्या उद्देशाने, अनगोळ येथील श्री राम युवक मंडळ आणि राजहंस गल्ली महिला मंडळ यांच्या संयुक्त विद्यमाने नवरात्रोत्सवानिमित्त पारंपरिक ‘हादगा’ (भोंडला) कार्यक्रमाचे अत्यंत उत्साही आणि भक्तीमय वातावरणात आयोजन करण्यात आले होते.
अश्विन महिन्यातील नवरात्रात निसर्गाचे आभार मानण्यासाठी आणि स्त्रीशक्तीचा जागर करण्यासाठी ही परंपरा वर्षानुवर्षे जपली जात आहे. याच परंपरेचे जतन करत राजहंस गल्लीतील महिला आणि युवतींनी एकत्र येत या कार्यक्रमात उत्स्फूर्त सहभाग नोंदवला.
कार्यक्रमादरम्यान मध्यभागी हत्तीचे चित्र (निसर्गाचे आणि समृद्धीचे प्रतीक) ठेवून, त्याभोवती फेर धरत महिलांनी हादग्याची पारंपरिक आणि मराठमोळी गाणी गायली. “ऐलमा पैलमा गणेश देवा…”, “कारल्याच्या वेलावर…” अशा पारंपरिक गीतांच्या सुरांनी आणि टाळ्यांच्या तालावर संपूर्ण परिसर दुमदुमून गेला होता. आधुनिकतेच्या काळात आपली मूळ संस्कृती आणि सण-उत्सवांचे महत्त्व पुढच्या पिढीपर्यंत पोहोचावे, हा या आयोजनामागचा मुख्य उद्देश होता.
हा सांस्कृतिक वारसा यशस्वीरित्या साजरा करण्यासाठी श्री राम युवक मंडळाचे कार्यकर्ते आणि राजहंस गल्ली महिला मंडळाच्या पदाधिकाऱ्यांनी विशेष परिश्रम घेतले. परिसरातील नागरिकांनी आणि महिलांनी या उपक्रमाचे भरभरून कौतुक केले असून, यामुळे गल्लीमध्ये एकतेचे आणि आनंदाचे वातावरण पाहायला मिळाले.
