कपिलेश्वर तलावात दुर्गामाता मूर्तींचे विसर्जन

 

ढोल-ताशांचा गजर, फटाक्यांची आतषबाजी; उत्साहात नवरात्रोत्सवाची सांगता

बेळगाव : शहर आणि परिसरात नवरात्रोत्सवानिमित्त विविध ठिकाणी प्रतिष्ठापना करण्यात आलेल्या दुर्गामाता मूर्तींचे विसर्जन विजयादशमीपासून सुरू झाले. ढोल-ताशांचा गजर, फटाक्यांची आतषबाजी आणि गाण्यांच्या तालावर थिरकणाऱ्या तरुणाईच्या उत्साही सहभागात दुर्गामातेला निरोप देण्यात आला. नवीन कपिलेश्वर तलाव आणि रामेश्वर तीर्थ अर्थात जकिनहोंडा तलाव येथे मूर्ती विसर्जनाची व्यवस्था करण्यात आली होती. बुधवारी सकाळीही कपिलेश्वर तलाव परिसरात विसर्जनाची प्रक्रिया सुरू होती.

विसर्जनासाठी महानगरपालिकेकडून नवीन कपिलेश्वर तलाव सज्ज ठेवण्यात आला होता. मंगळवारपासून क्रेनच्या साहाय्याने मूर्ती विसर्जनाची व्यवस्था करण्यात आली. मंडळांच्या कार्यकर्त्यांनी धार्मिक उत्साहात आणि भक्तिमय वातावरणात दुर्गामाता मूर्तींचे विसर्जन केले. विसर्जन मिरवणुकांमध्ये पारंपरिक ढोल-ताशांचा गजर आणि फटाक्यांच्या आतषबाजीमुळे उत्सवी वातावरण निर्माण झाले होते.

नवरात्रोत्सवानिमित्त शहरातील विविध भागांत दुर्गामाता मूर्तींची प्रतिष्ठापना करण्यात आली होती. नऊ दिवस पूजा-अर्चा, धार्मिक कार्यक्रम आणि महाप्रसादाचे आयोजन करण्यात आले. या काळात भाविकांनी दुर्गामातेचे दर्शन घेण्यासाठी मंडपांमध्ये गर्दी केली होती. विजयादशमीच्या मुहूर्तावर मूर्ती विसर्जनाने या उत्सवाची सांगता झाली.

पूर्वी शहरात दुर्गामाता मूर्तींची प्रतिष्ठापना करणाऱ्या मंडळांची संख्या मर्यादित होती. मात्र, गेल्या काही वर्षांत या मंडळांच्या संख्येत वाढ झाली आहे. यंदा शहरात ४० हून अधिक दुर्गामाता मूर्तींची प्रतिष्ठापना करण्यात आल्याचे सांगण्यात आले.

महानगरपालिकेकडून विसर्जनासाठी आवश्यक व्यवस्था करण्यात आली होती. मंडळांच्या कार्यकर्त्यांनी नवीन कपिलेश्वर तलाव तसेच रामेश्वर तीर्थ अर्थात जकिनहोंडा तलाव येथे मूर्तींचे विसर्जन केले. बुधवारी सकाळपर्यंतही विसर्जनाची प्रक्रिया सुरू असल्याने तलाव परिसरात उत्सवी वातावरण पाहायला मिळाले.