साठे प्रबोधिनी मराठी हस्ताक्षर, व्याकरण व निबंध स्पर्धेला ६६७ विद्यार्थ्यांचा उत्स्फूर्त सहभाग

बेळगाव : गुरुवर्य वि. गो. साठे मराठी प्रबोधिनी, बेळगाव आणि राज्य मराठी विकास संस्था, मुंबई यांच्या संयुक्त विद्यमाने आयोजित करण्यात आलेल्या मराठी हस्ताक्षर, व्याकरण व निबंध स्पर्धेला तब्बल ६६७ विद्यार्थ्यांनी उत्स्फूर्त सहभाग नोंदविला. विद्यार्थ्यांमध्ये मराठी भाषेविषयी प्रेम, अभिमान निर्माण करण्याबरोबरच शुद्धलेखन, सुंदर हस्ताक्षर, व्याकरणाचे ज्ञान आणि सर्जनशील लेखनकौशल्य विकसित करण्याच्या उद्देशाने या स्पर्धांचे आयोजन करण्यात आले.
विविध शाळांमधील विद्यार्थ्यांनी मोठ्या उत्साहाने या स्पर्धेत सहभाग घेतला. हस्ताक्षर स्पर्धेत विद्यार्थ्यांनी सुंदर व वळणदार अक्षरांचे नमुने सादर केले, तर व्याकरण स्पर्धेत मराठी भाषेच्या नियमांचे ज्ञान आणि आकलन यांची परीक्षा घेण्यात आली. निबंध स्पर्धेत विद्यार्थ्यांनी विविध विषयांवर आपले विचार प्रभावीपणे मांडत आपल्या लेखनकौशल्याचे दर्शन घडविले.
या स्पर्धेच्या उद्घाटनप्रसंगी प्रमुख पाहुणे अॅडव्होकेट सतीश बांदीवडेकर यांनी विद्यार्थ्यांना मार्गदर्शन केले. मराठी भाषा ही आपल्या संस्कृतीची, परंपरेची आणि विचारविश्वाची ओळख आहे. विद्यार्थ्यांनी मराठीचे नियमित वाचन करावे, शुद्ध लेखनाची सवय लावून घ्यावी आणि आपल्या दैनंदिन जीवनात मराठी भाषेचा अभिमानाने वापर करावा, असे आवाहन त्यांनी केले.
कार्यक्रमाच्या अध्यक्षस्थानी श्री. सुभाष ओऊळकर होते. अध्यक्षीय मनोगतात त्यांनी ६६७ विद्यार्थ्यांचा सहभाग ही या उपक्रमाची मोठी जमेची बाजू असल्याचे सांगितले. विद्यार्थ्यांच्या सुप्त कलागुणांना वाव देण्यासाठी अशा स्पर्धांचे सातत्याने आयोजन होणे आवश्यक आहे. मराठी भाषेच्या संवर्धनासाठी विद्यार्थ्यांच्या मनात भाषेची गोडी निर्माण करणे महत्त्वाचे असल्याचे त्यांनी नमूद केले.
कार्यक्रमाचे सूत्रसंचालन प्रसाद सावंत यांनी प्रभावीपणे केले. आपल्या ओघवत्या निवेदनातून त्यांनी कार्यक्रमातील विविध उपक्रमांची माहिती दिली. स्वागत व प्रास्ताविक सविता पवार यांनी केले. त्यांनी स्पर्धेचा उद्देश, आयोजनामागील भूमिका आणि विद्यार्थ्यांच्या उत्स्फूर्त सहभागाचे महत्त्व स्पष्ट केले.
गुरुवर्य वि. गो. साठे मराठी प्रबोधिनी आणि राज्य मराठी विकास संस्था, मुंबई यांच्या संयुक्त प्रयत्नातून आयोजित या उपक्रमामुळे विद्यार्थ्यांना मराठी भाषेतील विविध कौशल्ये विकसित करण्यासाठी एक प्रभावी व्यासपीठ मिळाले. ६६७ विद्यार्थ्यांचा सहभाग हा मराठी भाषेविषयी विद्यार्थ्यांमध्ये असलेल्या प्रेमाचा आणि उत्साहाचा प्रत्यय देणारा ठरला.

स्पर्धेच्या यशस्वितेसाठी आयोजक, शिक्षक, परीक्षक, स्वयंसेवक आणि विविध शाळांमधील शिक्षकांनी परिश्रम घेतले. विद्यार्थ्यांच्या उत्स्फूर्त प्रतिसादामुळे मराठी हस्ताक्षर, व्याकरण व निबंध स्पर्धा उत्साहपूर्ण वातावरणात यशस्वीपणे संपन्न झाली. स्पर्धा यशस्वी करण्यासाठी श्री मालोजी अष्टेकर, विजय बोंगाळे, गजानन सावंत, इंद्रजीत मोरे, धीरजजिंह राजपूत, बी. बी. शिंदे, शांताराम पाटील यांनी सहकार्य केले.