Belgaum Varta Belgaum Varta
बेळगाव : महिलांच्या सन्मानाच्या गप्पा मारणाऱ्या काँग्रेसने स्वतःच्या खासदाराशी संबंधित गंभीर प्रकरणावर आपली भूमिका स्पष्ट करावी, या मागणीसाठी आज बेळगाव येथे काँग्रेस भवनासमोर भाजप महिला मोर्चाच्या वतीने तीव्र निषेध आंदोलन करण्यात आले.
JNU चे माजी प्राध्यापक आणि काँग्रेसचे लोकसभा खासदार अंगोमचा बिमोल अकोइजम यांच्याशी संबंधित प्रकरणात ११ विद्यार्थिनींनी तक्रारी केल्याचे वृत्त आणि विद्यापीठाने केलेल्या कारवाईच्या पार्श्वभूमीवर, महिलांच्या सन्मानाचा मुद्दा उपस्थित करत भाजप महिला मोर्चाने काँग्रेस नेतृत्वाच्या भूमिकेबाबत जाब विचारला.
‘लडकी हूँ, लड सकती हूँ’ अशी घोषणा देणाऱ्या काँग्रेसने आता महिलांच्या सन्मानाच्या प्रश्नावर आपली भूमिका स्पष्ट करावी. राहुल गांधी, मल्लिकार्जुन खरगे आणि प्रियंका गांधी यांनी या प्रकरणावर मौन न बाळगता जनतेसमोर उत्तर द्यावे, अशी मागणी यावेळी करण्यात आली.
महिलांच्या हक्कांबाबत राजकीय सोयीनुसार भूमिका घेता कामा नये. महिलांचा सन्मान, सुरक्षितता आणि न्याय यांना पक्षीय राजकारणापेक्षा अधिक महत्त्व दिले गेले पाहिजे. आरोपांची निष्पक्ष चौकशी आणि कायदेशीर प्रक्रियेचा आदर राखतानाच, महिलांच्या तक्रारींकडे गांभीर्याने पाहणे ही प्रत्येक राजकीय पक्षाची नैतिक जबाबदारी आहे.
या आंदोलनात कर्नाटक राज्य भाजपा महिला मोर्चा सचिव डॉ. सोनाली सरनोबत, बेळगाव ग्रामीण महिला मोर्चा अध्यक्षा डॉ. भस्मे, बेळगाव शहर महिला मोर्चा अध्यक्षा शिल्पा केकरे, उज्वला बडवानाचे, सुनीता पाटील तसेच महिला मोर्चाच्या पदाधिकारी व कार्यकर्त्या आणि युवा मोर्चाचे कार्यकर्ते मोठ्या संख्येने सहभागी झाले.
महिलांचा सन्मान हा केवळ घोषणांचा विषय नाही, तर तो प्रत्यक्ष कृतीतून सिद्ध झाला पाहिजे! महिलांच्या न्यायासाठी आमचा आवाज बुलंद राहील. महिलांच्या सन्मानाच्या प्रश्नावर कोणतीही तडजोड स्वीकारली जाणार नाही, अशा प्रतिक्रिया भाजप महिला कार्यकर्त्यांनी दिल्या.
