केंद्रीय मंत्री प्रल्हाद जोशींसोबतची बैठक निष्फळ; ऊस उत्पादक शेतकऱ्यांचे उद्यापासून महामार्ग रोको आंदोलन

 

ऊसाच्या एमएसपीमध्ये वाढ आणि साखर कारखाने तातडीने सुरू करण्याची मागणी

बेळगाव : ऊसाला योग्य दर मिळावा, उसाच्या किमान आधारभूत किमतीत (एमएसपी) वाढ करावी आणि साखर कारखाने तातडीने सुरू करावेत, या मागण्यांसाठी आंदोलन करणाऱ्या शेतकऱ्यांच्या मागण्यांवर केंद्रीय मंत्री प्रल्हाद जोशी यांच्यासोबत झालेल्या बैठकीत कोणताही समाधानकारक तोडगा निघाला नसल्याचा दावा शेतकरी नेते चुन्नप्पा यांनी केला आहे. त्यामुळे मंगळवारी (१३ ऑक्टोबर) सकाळी ११ वाजल्यापासून राष्ट्रीय महामार्ग रोको आंदोलन छेडण्यात येणार असल्याचे त्यांनी जाहीर केले.

गेल्या दोन महिन्यांपासून उसाच्या एमएसपीमध्ये वाढ करण्याची मागणी केली जात आहे. मात्र, दरवाढीचा निर्णय घेण्यासाठी आणखी एक महिना लागेल, असे सांगितले जात असल्याने शेतकऱ्यांमध्ये नाराजी आहे. शेतीचा उत्पादन खर्च तिपटीने वाढला असून, ऊस उत्पादक शेतकरी आर्थिक संकटाचा सामना करत असल्याचे चुन्नप्पा यांनी सांगितले.

बैठकीसाठी सुमारे १०० शेतकऱ्यांना बोलावूनही त्यांच्या प्रश्नांवर ठोस निर्णय घेण्यात आला नसल्याचा आरोप त्यांनी केला. शेतकऱ्यांच्या मागण्यांबाबत केंद्र सरकारने तातडीने निर्णय घ्यावा, अशी मागणी करत त्यांनी केंद्रीय मंत्री प्रल्हाद जोशी यांच्या राजीनाम्याचीही मागणी केली.

राज्यात ऊस गाळप हंगाम सुरू होण्याची वेळ जवळ आली असून, पुढील चार दिवसांत साखर कारखाने सुरू करावेत, अशी मागणी आंदोलनकर्त्यांनी केली आहे. मागण्यांची पूर्तता न झाल्यास कर्नाटक आणि महाराष्ट्रातील राष्ट्रीय महामार्गांवर धरणे आंदोलन करण्यासह विमानतळ बंद करण्यासाठीही आंदोलन छेडण्याचा इशारा देण्यात आला आहे.

दरम्यान, घरगुती आणि व्यावसायिक वापराच्या साखरेसाठी स्वतंत्र विक्री व्यवस्था सुरू करावी, तसेच इथेनॉल उत्पादनाची संपूर्ण खरेदी सरकारने केल्यास ऊस, भात आणि मका उत्पादक शेतकऱ्यांना लाभ होईल, अशी सूचनाही शेतकरी नेत्यांनी मांडली.

आता लक्ष केंद्राच्या निर्णयाकडे

ऊस उत्पादकांच्या मागण्यांवर तातडीने तोडगा निघतो का, याकडे शेतकऱ्यांचे लक्ष लागले आहे. मागण्या मान्य न झाल्यास आंदोलन अधिक तीव्र करण्याचा इशारा चुन्नप्पा यांनी दिला आहे.