Belgaum Varta Belgaum Varta
बेळगाव : येत्या १ नोव्हेंबर रोजी पाळण्यात येणारा काळा दिन तसेच आगामी तालुका पंचायत व जिल्हा पंचायत निवडणुकांच्या पार्श्वभूमीवर बेळगाव तालुका महाराष्ट्र एकीकरण समितीची बैठक रविवार, दि. २५ ऑक्टोबर रोजी दुपारी २ वाजता मराठा मंदिर, रेल्वे ओव्हरब्रिजजवळ, खानापूर रोड येथे आयोजित करण्यात आली आहे.
१ नोव्हेंबर १९५६ रोजी भाषावार प्रांतरचनेच्या वेळी मराठी भाषिक सीमाभाग तत्कालीन म्हैसूर राज्यात समाविष्ट करण्यात आला. या निर्णयाच्या निषेधार्थ सीमाभागात दरवर्षी १ नोव्हेंबर हा काळा दिन म्हणून पाळण्यात येतो. यानिमित्त मूक सायकल फेरी काढून सीमावासीयांकडून निषेध व्यक्त केला जातो.
यंदाच्या काळ्या दिनाच्या आयोजनाबाबत तसेच कर्नाटक सरकारने जाहीर केलेल्या तालुका पंचायत व जिल्हा पंचायत निवडणुकांच्या संदर्भात कार्यकर्त्यांची मते जाणून घेऊन पुढील दिशा ठरविण्यासाठी या बैठकीचे आयोजन करण्यात आले आहे.
या बैठकीला बेळगाव तालुका महाराष्ट्र एकीकरण समितीचे पदाधिकारी, नियंत्रण व घटक समित्यांचे सदस्य, युवा व महिला आघाडीचे पदाधिकारी, आजी-माजी लोकप्रतिनिधी आणि कार्यकर्त्यांनी वेळेवर उपस्थित राहावे, असे आवाहन समितीचे अध्यक्ष व माजी आमदार मनोहर किनेकर, सरचिटणीस ॲड. एम. जी. पाटील, कार्याध्यक्ष आर. एम. चौगुले तसेच उपाध्यक्ष रामचंद्र मोदगेकर, लक्ष्मण होणगेकर, मोनाप्पा पाटील आणि विठ्ठल पाटील यांनी केले आहे.
