मुख्यमंत्री बदलाची शक्यता भाजपने फेटाळली

गैरसमज पसरविण्याचा कॉंग्रेसवर आरोप

बंगळूर : कर्नाटकमध्ये नेतृत्व बदलाबाबत अनुमान काढल्याबद्दल काँग्रेसची निंदा करताना, मुख्यमंत्री बसवराज बोम्मई यांच्या मंत्रिमंडळातील सहकाऱ्यांनी, कॉंग्रेसवर जोरदार हल्ला केला. विशेषत: महसूल मंत्री आर. अशोक यांनी स्पष्ट केले, की बोम्मई मुख्यमंत्री म्हणून कायम राहतील. २०२३ ची विधानसभा निवडणूक त्यांच्या नेतृत्वाखालीच लढवली जाईल. हिंमत असेल तर कॉंग्रेसने आपल्या पक्षाच्या मुख्यमंत्रीपदाच्या उमेदवाराचे नाव जाहीर करावे, असे त्यांनी आव्हान दिले.
अशोक म्हणाले की, केंद्रीय गृहमंत्री अमित शहा यांनीही बोम्मई यांच्या नेतृत्वाचे कौतुक केले. मुख्यमंत्रीपद बदलण्याचा प्रश्नच येत नाही. निवडणुकीनंतरही साधा माणूस बोम्मईच मुख्यमंत्री होतील.
भ्रष्ट काँग्रेस अशा अफवा पसरवत आहे. कर्नाटकात तिसरा मुख्यमंत्री असणार हे काँग्रेसचे ट्विट हास्यास्पद आहे. पंतप्रधान नरेंद्र मोदी आणि अमित शहा यांचे नेतृत्व काँग्रेसला कायमचे कोंडीत पकडेल, असे ते म्हणाले.
आदल्या दिवशी, कॉंग्रेसने मंत्री उमेश कत्ती यांची बातमी क्लिप टॅग केली होती ज्यात दावा केला होता, की ते देखील मुख्यमंत्र्याच्या शर्यतीत आहेत आणि ट्विट केले की सध्याच्या भाजप सरकारमध्ये कर्नाटकचा तिसरा मुख्यमंत्री असेल. अमित शहांच्या भेटीनंतर भाजपवर गडद छाया पसरली आहे, असे केपीसीसीने ट्विट केले होते.
त्यानंतर लगेचच आरोग्य मंत्री डॉ. के. सुधाकर यांनी ट्विट करत प्रतिक्रिया दिली, त्यांच्या (काँग्रेस) हायकमांडने वीरेंद्र पाटील यांच्यासारख्या मुख्यमंत्र्यांना जसे शर्ट बदलावे, तसे बदलले होते. काँग्रेसच्या काळात मुख्यमंत्री म्हणजे चीफ मिनिस्टर नसून चीट मिनिस्टर मुख्यमंत्र्यांऐवजी अशी अवस्था होती. दिल्लीच्या पोस्टमनने पाठवलेल्या चिटच्या आधारे काँग्रेसने मुख्यमंत्री बदलल्याचा हिशोब द्यायचा का? असा त्यांनी प्रश्न केला.
ट्विटच्या मालिकेत, सुधाकर यांनी बोम्मई यांच्या नेतृत्वाचा बचाव केला आणि मुख्यमंत्री बदलण्याच्या काँग्रेसच्या अटकळांना स्वप्नवत म्हटले. बोम्मई यांच्या कार्यक्षम नेतृत्वाखाली भाजप सरकार स्थिर आहे. काँग्रेस पक्षाच्या डबल डोअर बसमधून कोण उतरणार हे लवकरच कळेल, असे ते पुढे म्हणाले. दरम्यान, भाजपचे प्रदेशाध्यक्ष नळीनकुमार कटील यांनी काँग्रेसच्या ट्विटवर टीका केली ज्यात बोम्मई यांची लवकरच बदली होईल असे म्हटले होते.
एका व्हिडिओ स्टेटमेंटमध्ये, कटील म्हणाले की, बोम्मई पूर्ण कालावधीसाठी मुख्यमंत्री म्हणून कायम राहतील. काँग्रेस एआयसीसी प्रमुख सोनिया गांधी यांच्यावरील ईडीची कारवाई लपवण्यासाठी आणि ग्रँड ओल्ड पार्टीमधील मुख्यमंत्रीपदाच्या उमेदवारीच्या वाद घालण्यासाठी अशी विधाने करत असल्याचा आरोप केला आहे. ते म्हणाले की, भाजप पुढील निवडणूक बोम्मई यांच्या नेतृत्वाखाली आणि माजी मुख्यमंत्री बी. एस. येडियुरप्पा यांच्या मार्गदर्शनाखाली लढेल.
कॉंग्रेसला आव्हान
महसूल मंत्री आर. अशोक यांनी, प्रदेश कॉंग्रेस आपल्या पक्षातील मतभेदावर पांघरून घालण्यासाठी असे खोटे विधान करीत असल्याचा आरोप केला. कॉंग्रेस पक्षाने हिंमत असेल तर आपल्या पक्षाचा मुख्यमंत्रीपदाचा उमेदवार जाहीर करावा असे आव्हान दिले.