शिमोगा येथे ईद मिलाद रॅलीत दगडफेक, घरांचे नुकसान

शहरात तणावपूर्ण शांतता; ४० जण ताब्यात

बंगळूर : शिमोगा शहरातील शांतीनगर भागात पुन्हा हिंसाचार उसळला. ईद मिलादच्या मिरवणुकीत काल सायंकाळी कांही समाजकंटकांनी दगडफेक केली. त्यात कांही घरांच्या काचा फुटल्या व वाहनांचेही नुकसान झाले. त्यात कांहीजण जखमीही झाले. सुरक्षेचा उपाय म्हणून कडेकोट सुरक्षा व्यवस्था लागू करण्यात आली आहे. शहरात कर्फ्यू जारी करण्यात आला असून तणावपूर्ण शांतता आहे.
दरम्यान, या घटनेच्या संदर्भात ४० हून अधिक गुन्हेगारांना अटक करण्यात आली असून त्यांच्यावर गुन्हे दाखल करण्यात आले असल्याचे मुख्यमंत्री सिद्धरामय्या यांनी सोमवारी प्रसारमाध्यमांना सांगितले.
शिमोगा शहरातील शांतीनगर भागाजवळील रागीगुड्डा येथे रविवारी ईद मिलाद मिरवणुकीत दगडफेक झाल्यानंतर तणाव निर्माण झाला. जमावाने काही घरांवर आणि वाहनांवर दगडफेक केली, त्यांचे नुकसान केले आणि अनेक लोक जखमी झाले. रॅपिड ऍक्शन फोर्स (आरएएफ)च्या पथकांनी घटनास्थळी धाव घेतली आणि जमावाला पांगवण्यासाठी पोलिसांच्या पथकांनी सौम्य लाठीचार्ज केला. नंतर, भारतीय दंड संहिता (आयपीसी) च्या कलम १४४ अंतर्गत शहरातील काही भागांमध्ये प्रतिबंधात्मक आदेश लागू करण्यात आले.
याआधी रविवारी, म्हैसूरचे तत्कालीन शासक टिपू सुलतान यांचा कटआउट पोलिसांनी पडद्याने झाकल्याबद्दल परिसरात निदर्शने झाली, कारण त्याना भगवे कपडे घातलेल्या योद्ध्यांना मारताना दाखवण्यात आले होते. काही अहवालांमध्ये असे म्हटले आहे की शासकांच्या कटआउटवर पेंट लावले गेले होते. पोलिसांच्या कारवाईनंतर रागीगुड्डा येथे एका समुदायाच्या लोकांनी निदर्शने केली होती.
शिमोगाचे पोलिस अधीक्षक जी. के. मिथुनकुमार यांनी घटनास्थळी जाऊन आंदोलकांशी चर्चा करून त्यांना धीर दिला. मात्र, नंतर जमावाने घरांवर, वाहनांवर आणि अगदी पोलिस अधिकाऱ्यांवरही दगडफेक केली, असे मीडियाच्या वृत्तात म्हटले आहे.

परिस्थिती नियंत्रणात
शिमोगा येथील परिस्थिती आता शांततापूर्ण आहे आणि पोलीस शांतता राखण्यासाठी सर्व उपाययोजना करत आहेत, असे मुख्यमंत्री सिद्धरामय्या यांनी सांगितले.
एखाद्या समुदायाच्या धार्मिक कार्यक्रमादरम्यान अशांतता निर्माण करणे आणि दगडफेक करणे कायद्याच्या विरोधात आहे. आमचे सरकार अशा घटना सहन करणार नाही आणि त्या दडपल्या जातील, असे ते म्हणाले.
दरम्यान, गृहमंत्री जी. परमेश्वर यांनी सांगितले की, सर्व संशयितांना ताब्यात घेण्यात आले असून ही किरकोळ दगडफेकीची घटना आहे.
मास्क घातलेल्या काही बदमाशांनी दगडफेक केल्याच्या वृत्तावरील प्रश्नावर गृहमंत्र्यांनी सांगितले, की त्यांना आता अटक करण्यात आली आहे. “मिरवणुकीदरम्यान काहीही होऊ शकते याची जाणीव आहे कारण तो (शिमोगा) तणावग्रस्त भाग आहे, आरएएफसह सैन्य अगोदरच तैनात करण्यात आले होते, त्यामुळे आम्ही ते मोठ्या घटनेत वाढण्यापासून नियंत्रित करू शकलो, असे जी परमेश्वर यांनी सांगितले.
शिमोगा भाजपचे आमदार एस. एन. चन्नाबसप्पा यांनी रागी गुड्डा भागातील दगडफेकीमुळे नुकसान झालेल्या घरांना भेट दिली. बाहेरच्यांची भूमिका असल्याचा आरोप त्यांनी केला. चन्नाबसप्पा यांनी सांगितले की, “ज्यांना दहशत पसरवायची आहे त्यांच्यासाठी शिमोगा हे आश्रयस्थान बनले आहे.”
जिल्हा सशस्त्र राखीव (डीएआर) च्या किमान १२ प्लाटून, आरएएफच्या दोन प्लाटून, आणि कर्नाटक राज्य राखीव पोलीस (केएसआरपी) च्या दोन प्लाटून आणि २,५०० पोलीस जातीयदृष्ट्या संवेदनशील शहरात तैनात आहेत.
फेब्रुवारी २०२२ मध्ये शिमोगा येथे बजरंग दलाचा कार्यकर्ता हर्षाची हत्या करण्यात आली होती. स्वातंत्र्यसैनिक वीर सावरकर यांचे बॅनर आणि पोस्टर्स उभारण्यावरूनही शहरात चाकूहल्ला करण्याच्या घटना घडल्या होत्या.