केसरेकर दांपत्य हत्याकांड: आरोपीला फाशीच्या मागणीसाठी २१ ऑगस्टला बेळगावात भव्य मूक मोर्चा

पोलीस आयुक्तांना निवेदन
बेळगाव : सांगली जिल्ह्यातील कुपवाड येथे झालेल्या बेळगाव जिल्ह्यातील मराठी दांपत्याच्या निर्घृण हत्येचा निषेध करण्यासाठी आणि आरोपीला तात्काळ फाशीची शिक्षा देण्याच्या मागणीसाठी बेळगावात येत्या शुक्रवार, २१ ऑगस्ट रोजी सकाळी ११:०० वाजता एका भव्य मूक मोर्चाचे (शांतता रॅली) आयोजन करण्यात आले आहे. बेळगावचा मराठी समुदाय आणि मराठा समाजातर्फे या मोर्चाचे आयोजन करण्यात येत असून, आज या संदर्भात बेळगावचे पोलीस आयुक्त भूषण गुलाबराव बोरासे (IPS) यांना परवानगीसाठी अधिकृत निवेदन देण्यात आले.

मूळचे बेळगाव जिल्ह्यातील खानापूर तालुक्याचे रहिवासी असलेले श्री. मोहन नागप्पा केसरेकर (वय ४५) आणि त्यांच्या पत्नी श्रीमती निशा मोहन केसरेकर (वय ३५) हे कामाच्या निमित्ताने सांगली जिल्ह्यातील कुपवाड येथील विघ्नहर्ता शांती कॉलनी, एमआयडीसी परिसरात राहत होते. तिथे आरोपी फरिद अब्दुल शेख (वय ५०) याने या दांपत्याची धारदार शस्त्राने वार करून अत्यंत निर्घृण हत्या केली. या घटनेमुळे संपूर्ण बेळगाव आणि सीमाभागात तीव्र संताप व्यक्त होत आहे.
असा असेल मोर्चाचा मार्ग आणि वेळ:

* दिनांक: शुक्रवार, २१ ऑगस्ट २०२६
* वेळ: सकाळी ११:०० वाजता
* प्रारंभ: सरदार हायस्कूल मैदान, बेळगाव
* समारोप : जिल्हाधिकारी (DC) कार्यालय, बेळगाव

हा मोर्चा सरदार हायस्कूल मैदानावरून सुरू होऊन जिल्हाधिकारी कार्यालयावर पोहोचेल. तिथे जिल्हाधिकाऱ्यांना मागण्यांचे औपचारिक निवेदन सादर केले जाईल. हा खटला जलदगती न्यायालयात (फास्ट ट्रॅक कोर्ट) चालवून नराधम आरोपीला मृत्युदंडाची (फाशीची) शिक्षा व्हावी, ही या मोर्चाची प्रमुख मागणी आहे. हा मोर्चा पूर्णपणे शांततेत, कायदेशीर आणि शिस्तबद्ध पद्धतीने पार पाडला जाईल आणि पोलीस प्रशासनाला वाहतूक व शांतता सुव्यवस्थेसाठी पूर्ण सहकार्य केले जाईल, अशी ग्वाही संयोजकांनी दिली आहे.
पोलीस आयुक्तांना निवेदन देताना श्री. रमाकांत कोंडुसकर, हरी शानबाग, सागर पाटील, कपिल भोसले, प्राचार्य आनंद आपटेकर, संदीप कामुले, राजेंद्र बैलूर, सातेरी नाईक, शुभम पाटील, नंदू इंदूलकर यांच्यासह मराठा समाजातील आणि मराठी समुदायातील प्रमुख पदाधिकारी, कार्यकर्ते आणि नागरिक मोठ्या संख्येने उपस्थित होते.