पालकमंत्री सतीश जारकीहोळी, लक्ष्मी हेब्बाळकर यांच्या नेतृत्वाखाली आज आढावा बैठक

बेळगाव : बेळगाव महापालिकेच्या सभागृहात आज सार्वजनिक बांधकाम मंत्री सतीश जारकीहोळी, महिला व बालकल्याण मंत्री लक्ष्मी हेब्बाळकर स्मार्ट सिटी, बुडा आणि पाणीपुरवठा विभागाची आढावा बैठक घेणार आहेत.
महापौरांच्या नेतृत्वाखाली नुकत्याच झालेल्या सभेत नगरसेवकांनी प्रामुख्याने सार्वजनिक बांधकाम विभागाच्या विरोधात जोरदार घोषणाबाजी केली. विशेषत: भाजपचे सदस्य नाराज असून आज दोन्ही मंत्र्यांच्या अध्यक्षतेखाली होणाऱ्या बैठकीत यावर गंभीर चर्चा होण्याची शक्यता आहे.
बेळगाव स्मार्ट सिटीतील निकृष्ट काम, भ्रष्टाचार, पिण्याच्या पाण्याची समस्या, नगर विकास प्राधिकरणाच्या जागा वाटपावर बैठकीत आवाज उठवला जाणार असल्याची माहिती आहे.
शहरातील एल अँड टी कंपनीच्या विरोधात नागरिकांची निदर्शने सुरू आहेत. पिण्याचे पाणी वेळेत येत नाही. जिथे अडचण आहे तिथे एल अँड टी कंपनीचे कर्मचारी येत नाहीत. एल अँड टी कंपनीलाही याचा फटका बसण्याची शक्यता आहे.
कालच सार्वजनिक बांधकाम विभागाचे मंत्री सतीश जारकीहोळी यांनी “त्या” भाजप आमदारांसाठी काम करणाऱ्या अधिकाऱ्यांची जिल्ह्यातून बदली करून लोकांसाठी काम करणाऱ्या अधिकाऱ्यांची नियुक्ती करण्यात येणार असल्याचे सांगितले. त्यामुळे भाजपचे आमदार बैठकीला येणार का, हे पाहणे गरजेचे आहे.